特許經營的背後──畀錢買開荒牛

   

 

　　多年前，香港掀起咗「特許經營／加盟」呢個商業模式嘅熱潮，當年最為人熟識嘅加盟集團應該係某某便利店，而今時今日亦出現咗好多飲品店、小食店、迷你倉等等嘅加盟集團。創業者以特許經營方式加盟別的公司，多數嘅心態係想借大公司名氣同有系統生意模式幫自己創業，希望以「較安全」而快捷嘅方式作起步，達成自己嘅創業夢。所以特許經營吸引咗好多對職場心灰而冷嘅打工仔，希望靠呢盤生意為自己退休作打算。

 

　　特許經營聽落好似好好做，你只要攞幾十萬出嚟作本，集團會提供一站式嘅服務，由營運培訓、行政運作、市場推廣、保安物流等等都有支援，只要你肯努力，用時間同汗水就可以換來成功。要成功其實唔難？當然唔係啦，加盟前，其實有好多考慮因素。 

 

集團點賺錢？

 

　　同朋友／集團合作做生意，第一件必要考慮嘅事情係，點解人哋會搵你合作，而佢哋嘅「賺錢位」又喺邊度。同朋友合資做生意原因可以好簡單，朋友合作除咗能夠解決資金上嘅問題之外，亦可集各家大成之長，眾志成城一齊創業。但同集團合作做生意，又完全係另一回事。

 

　　最直簡單咁諗，特許經營帶俾集團嘅收入除咗收取加盟金外，其次就係每個月嘅分成。但大家如果細心一諗，大多集團本身已有一定嘅人力、物力、資金同智囊，而較大型嘅集團更加唔會志在加盟者每月嘅分成同加盟金，如果佢哋要計劃開分店，自己一手包辦開店可能仲簡單過引入加盟者，根本無需同其他人分一杯羹。

 

　　其實集團仲有另一個賺錢位，就係賺取「機會」，或者俗啲講「比錢買開荒牛」。每盤生意最理想嘅情況必定係「更有一間喺左近」，全港各處都有自己嘅分店。但最難嘅事情就係，如何選擇適當嘅地方開店。如果公司不停喺唔同地方開店作試點，成本會好大，成功率亦未必高，最後可係損手收場。但引入加盟者就可以分擔風險，亦可以減低「開荒」成本。當加盟者開業成功，公司見到該店有盈利同前景嘅時候，加盟者就完成咗佢「開荒牛」嘅使命。公司會重新審視該地點嘅生意策略，然後大家就會見到有另一間分店喺旁邊出現，造成「自己人打自己人」嘅情況，之後大部分嘅生意都會被搶走。最終加盟者嘅分店不敵「親生仔」，盈利大減被迫退場。就算「開荒牛」創業失敗，但因為加盟條款多數都係保障集團多於加盟者，所以集團亦唔會有好大嘅損失。

 

加盟者點賺錢？

 

　　計盈利前先計成本，加盟金有多有少，視集團規模／業務而定。如果以45萬入場費計算，同集團分成後每月平均盈利有 2萬-2.5萬，大約2-3年後回本，當然加盟者仲要準備一筆流動資金作營運之用，分分鐘需要大約近100萬起動資金。

 

　　但加盟通常都有合約期，當合約期完結後，如果集團見分店有錢賺、有前景，多數會收回店舖而唔同加盟者續約。講咗咁耐，根據以上分析，如是者你會見倒盤生意嘅盈利計算方法完全唔同。假設合約期為5年，45萬加盟金，首2-3年每月有 2萬-2.5萬收入，然後2年半後開始有正收入，但因為旁邊開咗間新嘅分店而令盈利大減，假設減到大約每月得1.5萬-2萬。最後，5年計加盟者共賺45萬-60萬，除開一個月平均有1萬收入。另外有一點要注意，收入會因唔同地區有高有低，集團亦唔會保證你一定賺錢，所以失敗例子都唔少。

 

　　當然，以上只係一個好粗略嘅計法，唔同生意／情況會令數字會有高有低。但因為香港地方太細，成功嘅例子愈來愈少。要成功創業，最緊要識計數，唔好只計最多可以賺幾多，同時亦要作最壞打算，咁先可以做到「進可攻、退可守」。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》心理急救II：幾個徵兆辨認身邊人需要心理支援！點樣對情緒進行急救、自我照顧？專家分享穩定情緒小練習► 即睇