【轉工抉擇】工作一直不順利，可能是入錯行！

　　早前同同事review，過去幾年佢工作經常力不從心，唔知係經驗不足，還是自己工作能力力有不逮。畢業後工作五年，做事永遠「逢二進一」，所以其他同事背後稱佢為「二進制」。但幸好佢有一顆赤子之心，失敗後總能爬返起身，五年來先能夠屢敗屢戰。

　　擁有永不言敗嘅心係好事，但唔服輸還唔服輸，經常失敗必定有原因。如果係運氣／意外，你可以唔服；如果係輸畀一位高手，你可以唔服；但次次都輸，就要反思係咪自己有問題。工作也好，做人也好，開始時都未必一定揀啱自己嘅路。如果真係入錯行、唔服輸、磨爛蓆，其實你嘅未來已經輸咗一半，你要用比人多一倍或者更多嘅時間去爭取機會，仲要未必成功。別人用三年時間已經升職，但你用咗六年都仲等緊機會嘅出現。更甚嘅係，當你工作三五七年後，去到一個唔上唔落嘅位置時，亦好難判斷自己係入錯行，定係其他問題，到時你想轉行亦好困難。

　　其實剛剛轉到一個新環境，大約兩、三年就可以知道自己有冇入錯行。第一年係摸索期，好多人做所有事情都係撞板多、成功少，平平坦坦為數亦不少。但初期嘅成功唔一定係好事，撞板多亦未必係壞事，可能係能力問題，亦可能係運氣問題。踏入第二年，開始唔能夠再靠好運，但就算能夠繼續之前嘅成功，都唔好開心住，可能只係公司／上司嘅關係，並唔係自己嘅實力勝人一籌。不過如果第二年都仲係成日撞板、事事逢二進一，開始要搵一個新方法處事、做個轉變，可能係「用錯力」。第三年，仲未能「搵到自己」的話，基本上轉行係事在必行，就算唔轉行都一定要轉工。而如果你都仲係咁得心應手的話，恭喜你，已經成功咗一半。到最後測試，就係轉工，因為轉工先能夠見真章，放低「好彩」、「一個照顧你嘅上司」、「comfort zone嘅公司」，看看自己能力喺市場上嘅價值。其實如果情況許可，就算未到三年，轉工試試自己實力，未嘗唔係一件好事。

　　不論工作三年定係六年，當開始發現自己去咗一個錯嘅舞台，或者係去到樽頸位時，千萬唔好因為害怕浪費之前嘅青春同經驗，而唔捨得走。人生工作四十多年，當中重新嚟過嘅機會好常見，所以用三年認清方向其實只係好小事。開始時，盡可能用多少少時間搵一個適合自己嘅目的地，總好過航行二十年後，先發現架飛機飛咗去錯嘅地方。所以認輸，唔代表一切，肯勇敢面對，先係王道。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》心理急救II：幾個徵兆辨認身邊人需要心理支援！點樣對情緒進行急救、自我照顧？專家分享穩定情緒小練習► 即睇