【小問題拆解】不要忽視見工時的無關痛癢問題！6條必問面試題目大拆解（下）

　　應徵者好多時會忽略一啲簡單而無關痛癢嘅問題。雖然好多對答都十分常見，但回應嘅方法亦有好多種。如果對答得宜，有好多貌似唔太重要嘅問題，其實都藏著「加分位」。

 

「工餘時有乜野興趣」

 

　　類似嘅問題有好多，多數出現喺面試嘅尾段，面試官會問及一啲唔太重要、工作以外嘅問題，主要目的有兩個：一，希望從工作以外嘅事情了解你人品；二，可能之前嘅對話未能好好了解你嘅溝通技巧，所以想透過其他閒談作進一步觀察。

 

　　「減壓方法」、「工餘興趣」、「下次旅行會去邊」等等工作以外嘅話題，係最能令人放鬆心情，去表達自己真性情嘅一面，所以回應時盡量做返自己。冇需要拉入同工作相關嘅話題，「工餘我都係做research，研究xxxx，希望對工作有幫助」，勉強提及工事，只會令人覺得你過份虛假，要盡量避免。另一方面，如果情況可以的話，言談中不防多表達自己對事件嘅睇法，唔好令人覺得你只係一個「問乜答乜」、「問一句答一句」嘅人，要對事情有獨特嘅見解、能看到事情嘅細節，「工餘時我經常睇戲，除咗係興趣之外，亦可以減壓。因為當你進入漆黑嘅戲院，感覺呢兩小時好似離開咗自己嘅肉體一樣。而看別人嘅故事，置身其中，亦會有好多得著」。呢啲除咗係加分位之外，如果論點／題目同面試官思想相近，亦可以拉近相方距離。

 

「滿足感從何以來」

 

　　打工仔嘅滿足感，主要來自金錢、工作嘅成功感、工作環境三方面，較為老手嘅面試官/ HR，會從不同嘅角度去分析應徵者嘅expactation，同公司職位所需嘅Core Competencies（核心技能）是否配合。

 

　　不同公司/ 職位嘅Core Competencies都唔同，communication、decision making、leadership、motivation、planning and organizing、responsibility、teamwork等等，每個職位嘅重要性都有高低。當應徵者工作能力大致達標時，motivation就變得重要，因為motivation下降除咗影響工作效率，亦會令同事產生辭職嘅念頭。如果應徵者嘅首要條件係金錢的話，部分公司會唔介意比多少少錢，希望令同事更為忠誠，減低員工流失時所帶來嘅影響。但回答同類問題時記得，坦白之餘切記要包裝一番，「錢當然重要，但工作嘅成功感有時會更為重要。工作除咗要得到『奬金』，亦要得到『掌聲』」。

 

「你前公司嘅生意如何運作」

 

　　好多老細會喺見工時借故刺探軍情，雖然手法並唔係太恰當，但就十分常見。同類情況建議應徵者千萬唔好太坦白，一來可能有抵觸，二來如果今日透露前公司嘅資料，代表他日你亦可能會將現公司嘅資料透露出去。

 

　　雖然可能有抵觸，但唔建議一開始就請對方食閉門羹。建議應徵者嘗試只透露一啲人所共知嘅事實，或者將重點轉移「其實我公司同  貴公司嘅運作模式應該大致相近，過去我哋都集中資源喺項目A之上，所以你會見到媒體有報導項目A嘅新聞。就報導所見，項目A嘅成績係........」。如果面試官真係步步進逼，最後只好老實回應「因為前公司合約列明，半年內唔能夠透露工作內容，如果有機會的話，將來可以分享更多資料」，希望對知難而退。

 

　　面試係一個相向嘅過程，雖然應徵者好多時處於被動嘅一方，但只要了解每個提問背後嘅目的，亦能做到得心應手。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】政府擬立法規定所有的士須於車內安裝攝錄設備，你是否認同？ ► 立即投票