【網絡營銷工具】從「喂Brian」到ClickFunnels，如何將生意網絡化、在網上賺大錢？

　　「好多朋友問我，喂Brian ，其實有乜嘢方法可以做到日薪高達五、六位數字？」，早前好多YouTube觀眾每日都會不停聽到「喂Brian」，但就因為每日都太多「Brian」，所以引來大眾反感。近期好多不同創業達人喺YouTube上投下海量廣告，宣傳網上生意發達大計，其實全世界嘅人都好想知「如何日薪六、七位數字」，但我相信知道方法嘅人，應該甚少會高調地、慷慨地講「呢幾年我都賺夠」。而事件當中，大家都會將其「大計」同一個工具拉上關係，而呢個工具就係一個ClickFunnels。

 

　　ClickFunnels喺巿場上已經出現咗一段時間，初期以外國用家為主，十分流行，亦有好多「網絡大師」用其推廣自己嘅營銷 / 創業課程，近年亞洲地區先開始多人認識。而喺marketing嘅角度看，ClickFunnels 大致上可以分三大層面。

 

自助網頁製作平台

 

　　ClickFunnels (CF) 其中一個主軸，就係一個自助網頁製作平台，同Wordpress、Shopify等等有少少類似，而CF所提供嘅平台，相對地較為簡單易用，對於一啲冇寫網頁嘅人嚟講，係十分有用。尤其喺疫情期間，大部分生意都要「網上化」，而好多中小企同失業人士都冇可能短時間內學識寫網頁，再將業務轉戰網上巿場，所以CF係佢哋其中一個方便嘅解決方案。

 

　　CF雖然簡單易用，亦有不同template選擇，但template始終係template，選擇一定有限，同時會有好多掣肘，未必能夠100%滿足你嘅需要。另一方面，有部分用家指CF喺Google嘅SEO能力較正常弱，網頁嘅loading time亦較慢。所以用家要從「方便」與「功能」上取得平衡，選擇適合自己嘅工具。

 

Email Automation

 

　　對網上營銷新手嚟講，佢哋嘅email marketing功能可能較為實用。CF多鼓勵用家收集客戶資料（Lead），所以平台上亦有功能幫用家簡易地收集客戶email。收集後系統會因應唔同情況自動send email畀你嘅客戶，自動＋主動地同客戶溝通，再配合其他網絡營銷工具如remarketing等，希望能夠一步步同客戶產生互動，最後購買你嘅產品/ 服務。

 

　　表面看似簡單，但其實仲有好多問題需要用家去判斷，例如如何有效地引流你嘅客戶進入網站填上email？如何令近年成效每況愈下嘅email marketing效能提升？如何令你嘅email嘅內容更加吸引？等等等等。要解決以上等等嘅問題，先能夠達到完成生意嘅結果。

 

賺取佣金

 

　　其中一個令CF十分受歡迎嘅原因，必定係其佣金制度，令會員可以有經常性收入。只要你成為合資格會員，再達到某個條件，成功推薦畀朋友後，你就會獲得最高40%嘅佣金。甚至你未必需要經營一門生意，但只要你用呢一個網頁製作平台，簡單建立一個營銷網頁，再經推薦後賺取佣金，可謂一站式賺錢生意服務。

 

　　先不談呢個佣金制度是否呃人，或者道德上是否正確，從金錢角度看，的確係十分吸引。但有幾點要去考慮，你用乜嘢去換來佣金？你推薦時嘅出發點又係乜嘢？而你又用乜嘢嘅手法去推薦/ 包裝呢件事？值得大家反思。

 

　　以前行內成日講一句話，「經歷過沙士、九一一恐怖襲擊、環球金融海嘯等重大考驗而仲屹立不倒嘅marketer，先係真marketer」。近年（尤其疫情發生後）出現好多營銷高手，教人生意網絡化、網上賺大錢，有人說係「少林大師」，亦有人說係「牛鬼蛇神」，大家要自行判斷。

 

　　從生意角度看，武功係冇對錯之分，只要能夠打贏競爭對手、賺到錢，就係好武功。但點樣運用學到嘅武功、拜邊個大師門下，就要小心選擇。

 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好