【職場社交技巧】切忌為派而派！交換卡片的意義：尋找可分享「價值」的人！

　　交換卡片係所有社交活動其中一個十分重要嘅環節。雖然好多人視為公式，但另一方面亦好多人會把握機會，令呢一個人人視為「無謂」、「為交換而交換」嘅事情增值，令卡片不再只係卡片。其實交換卡片背後係有著「分享」呢個意義，你分享你嘅「價值」畀對方，而對方亦會將你當作佢哋嘅「價值」，再「分享」畀其他人，所以派卡片某程度上係一個「人傳人」嘅品牌概念。當了解呢一個「分享價值」概念再為其增值，就要從兩大層面著手，第一就係卡片本身，第二就係派卡片呢個行為。

　　好多公司同員工都視卡片為一張「寫上聯絡方法嘅紙仔」，公司為員工印卡片只係例行公事，而同事派卡片係因為對方派畀你，所以你要派返畀對方，但實情係大家一直都冇諗過卡片本身潛在價值。例如近年好多公司開始讓員工喺同一個模辦下設計自己嘅卡片，喺卡片其中一面加入個人元素，咁做除咗可以令員工更有存在感同歸屬感、自豪地派自己嘅卡片之外，另一方面DIY卡片亦可以成為你破冰嘅工具，藉此同對方打開話題，使對方更了解公司理念同員工設計嘅想法。如果設計獨特，對方更會有一種「集郵」嘅感覺，希望集齊一套「閃咭」。能夠令對方有一個深刻印象，已經係品牌嘅成功，同時間亦將其價值遠超過一張卡紙。 

　　出席社交場合嘅人通常有兩大目的，一係想「搵人」，其次係想「見人」，如果唔了解自己嘅目的，就算卡片幾特別都好，都只會變回一張廢紙。其實所有社交活動，好多時都係因為「價值」而產生，所以每一位參加者都會計算出席呢個活動嘅價值同埋其他參加者嘅價值，當佢哋要「搵人」或者「見人」時，都係依呢個價值去做事。其實「見人」意思係見一啲對方會覺得自己有價值嘅人，「搵人」意思係搵一啲對自己有價值嘅人，而派卡片就係想「見人」，收卡片就係想「搵人」。所以你係想透過該活動去搵人定見人、收卡片定派卡片，就要清楚自己嘅角色同對他人嘅價值，咁先唔會「白去」。

　　其實交換卡片最重要並唔係交換嗰一刻，而係交換之後如何發揮卡片嘅價值、如何善用收到嘅卡片、如何令對方善用你嘅卡片。記緊千萬唔好為派而派，淪為社交場合嘅過客。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【etnet 30周年】多重慶祝活動一浪接一浪，好禮連環賞！ ► 即睇詳情