行行出狀元，亦行行交學費。

　

　　任何一行要成專家或成「精」，需要日月浸淫磨練，吸收經驗，由白紙一張至「人老精鬼老靈」，必須付出血汗淚，仆過跌過才成「運動健將」。

　

　　每一行都有竅門，亦有古靈精怪蛇蟲鼠蟻。所以，就算你是某一行專家，叻到會飛，但一去到另一行，即可能瓜直，交巨額學費。

　

　　小弟見得最多為明星、醫生、公務員，若只做本行一定可以安穩無憂過世，但衰在心癢癢想學人做生意。弊！結果，十個有九個被行內的「蛇」及「棍」呃清光，蝕到眼坦坦。

　

　　昨晚與退休名人大J共樽前，此君在公職界勁爆玻璃，本搵夠退休，但唔想就此呆呆終老，於是，攞三百萬出嚟搞間餐館「玩吓」，拉埋老婆落水做收銀，睇住個最重要位置。

　

　　大J起初諗：「以我縱橫江湖閱歷，加上叱吒一時，必定人人俾面，大把客。搞間餐館仔容乜易，日日收現金，而來貨食材就三個月找數，點計都冇死。上咗軌道即交經理睇住，自己就可優哉悠哉去遊山玩水，得閒才返餐館打躉，約大班老友吹吓水！爽！」

　

　　結果呢？慘情，做咗未夠一年，蝕光！雄心壯志被磨滅外，連自信心亦被打殘。

　

　　因為，大J一切諗得太簡單喇！所以，交學費交到暈。佢兩杯到肚，指出幾大死因：

　

　（一）成班廚房佬及樓面，「恰」佢新嚟，乜都偷，貴至花膠冬菇鮑魚，平至一條葱一塊薑都偷，防不勝防，廚房後門為「走私」通道。

　

　（二）凡親戚朋友來「光顧」，全部個心都想攞著數，最好你簽單請客。要俾，都只想俾五、六折，呢群「客人」最攞膽，見到就頭痛。

　

　（三）日日開門煩惱就來，黑社會收規、冷氣壞、塞油喉、廁所爆渠、有老鼠⋯⋯總之，瓣瓣要老闆搞。

　

　（四）做生意，無客就心慌慌，太多客就做到儍，精神壓力極大，個個月交十幾萬租，分明替業主打工。

　

　（五）老婆大人日日夜夜困在收銀小空間，怨氣日比日多，夫婦鬧交多過食飯，唔知為乜。

　

　　終於，大J把心一橫，衰衰地都要認失敗，關門大吉止蝕，唔見三百萬算數，呢世都唔再做餐館。終於肯認：「我其實唔係咁叻，唉！」

　

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》：講講常見年輕人理財問題！想「人有我有」？認可理財社工分享理財觀念小秘訣！► 即睇