近期銀髮市場極活躍，因推出Silver Bond，凡行得走得（因部份長住護理安老院）者，無不蜂湧認購，因政府派錢也。我鼓勵身邊所有長者瞓身認購，賺梗的先賺，再決定點用，做善事也未嘗不可，福有攸歸呀！

　

　　現今香港65歲以上長者達一百一十幾萬，若拉低到六十歲，超過百五萬，年年大幅增長，因戰後嬰兒出生潮全部逐一夠鐘做長者也。這群人特色，為食正香港七、八、九十年代經濟起飛，若勤勤懇懇唔賭唔亂做生意，理應搵夠基本退休生活所需，此外，更有閒錢享受生活。

　

　　所以，銀髮市場乃一個大藍海，只待有視野的企業家去開發。當然，要小心，否則，變咗「雋悅」咁，計錯數就真係喊都無謂，唔知點收科也。

　

　　最近，終有機會參觀「富貴長者屋」雋悅，發覺設施及環境，真的很吸引，有機會入住就好嘞。不過，讚嘆完，都要計數噃，真的計唔掂。因為，呢個世界，最怕貨比貨！

　

　　冇錯，雋悅就似一個豪華屋苑，有泳池、有圖書館、有迷你戲院、有足夠公共空間。但是，要入住者先俾一大筆，然後，再俾管理費、服務費，有部分設施又另外收費，加加埋埋，就俾人有個黑洞感覺。

　

　　況且，一切室內設備維修保養，邊個負責呢？壞咗邊個換呢？大廈他日大型翻新時，是否需要夾天文數字呢？

　

　　一計之下，以香港人咁精靈，當然耍手擰頭。

　

　　同是租住豪華屋苑，何文田長實旗下的半山一號，幾年前入伙後，有大量單位空置放租（明顯不少業主炒燶），一千呎至千五呎租盤，三萬至五萬間，非常多選擇，全部包管理費、差餉外，室內一切用品維修保養，皆不用租客負責。兼且，又可用屋苑會所全部設施。

　

　　我單舉一個例，已知雋悅在面對市場競爭時，根本全無優勢可言。所以，入住率僅過一成。市場永遠正確，如今，香港房屋協會睇錯市，點搞呢？若收入如此低而長期要維持龐大支出，真會蝕死人也。

　

　　事到如今，房協實在冇選擇，必須將價錢，降到有競爭力水平，例如大幅減租搶客，將其他豪華屋苑長者租客先搶過來，增加收入，應付每月巨額支出，再希望貴客們住過後，短租變長住。

　

　　此外，收費方面，要盡量簡化，似外邊市場，業主只收一筆費用而包起所有管理費、差餉及維修費用（當然，醫藥費及家居清潔費另計），令大家安心。

　

　　雋悅乃房協計錯數之作，無法，做生意冇包賺，唯有低低地躀一鋪，減價去貨，總好過長孭空置單位，不知年年月月補貼到何時！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》身體唔舒服查唔到原因？周身痠痛疲累？可能係患有心身症！點解原生家庭會長時間影響一個人？點樣脫離循環？► 即睇