退休投資大忌：貪

　　人，尤其是生活沉悶的人，有錢就會身痕。我四出分享退休心得，凡見在座的是打工一族時，必非常肉緊忠告——切勿持有太多現金閒錢！一定要有紀律性地將錢「泊」在穩健不蝕（未必賺）的投資上（政府年金、銀債、公用股），以嚴禁自己一時把持不定。

 

沉悶的退休者，若有閒錢在手，乃是最佳「水魚」。

退休投資最安全，為將「棺材本」泊在公用股、銀債及政府年金。

　

　　點解？簡單，若你經常有三幾百萬現金銀行，即會吸引各式各類「投資顧問」（包括大銀行！）游說你買這買那以賺取「豐厚利潤」，力指閒資呆在戶口內會蝕息，不智。

　

　　為何咁「關心」，咁「肉緊」你蝕息？一字咁淺，正是希望你接受佢哋「服務」。而這些「服務」的得益者，當然並非閣下，而正是利用你三幾百萬資本舞出舞入賺佣的「投資顧問」！

 

任何「投資顧問」首要目標是「賺你錢」而非「替你賺錢」。

 

　　好了，就算沒「投資顧問」搞你，很多時，你也會不甘心錢呆在戶口，心思思手多多，希望測試自己的過人眼光。

 

古有明訓：貪者最易變貧。尤其加埋恐慌元素。

　

　　老友記「口水朱」，正是這類人。搞到我不是要喝住佢。否則，幾百萬退休金早早蒸發。

　

　　阿朱乃小男人，特色為貪心，但分析力奇弱。唯一好彩（？）是識著小弟，有任何重大決定時，都先問兩句。

　

　　上周，我又大力煞停佢兩項想瞓身的「投資」。

　

　　「碌Sir，我想博兩個項目：一、萬州國際（0288），呢間全國最大肉類供應商，因主席萬隆兩父子反大面，股價由6月$7.5碌落$5.57，冇咗接近三成，係咪時候掃貨呢？二、中國恒大（3333）由高位超過$20跌到如今$3左右。佢哋揸住咁多物業，好似大到不能倒，阿爺可能會出手救。一旦反彈，唔係嘢少，博得過？」

 

股票急跌當有其因。胡亂掃入，可能變跳火坑，再難抽身。

　

　　「口水朱」一旦瞓身這兩公司，會點？分分鐘幾百萬凍過水，唔知點過埋下半世！

 

世上並沒有無緣無故的超高息債券，一定有危機在背後。

　

　　「阿朱，一、萬隆父子大戰，只剛剛開始！阿仔萬洪建早前爆的『我老竇違法！』極可能只是第一槍！指控若有一半真，已將會令萬州及萬隆「雞毛鴨血」，不知災情將有多深，內鬥會有幾狠。這隻股票，不但不可趁低吸納，反應全面清貨！君子不立危牆之下也。二、恒大據講連銀行利息都冇錢俾，債券跌到一仆一碌。阿爺出重手打擊內房企業，執笠潮剛剛開始。恒大的困境，一定程度由阿爺的政策導致，又豈會反手相救？股票，可以低處未算低，甚至變廢紙。你貪心仆入去？可能會同佢攬炒，渣都冇㗎，懵佬！」

 

若連「股票可以變廢紙」的道理也不懂者，蝕光也不會有人同情。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】財政預算案展開公眾諮詢，學者倡問責官員減薪並削減公務員編制，你是否認同？ ► 立即投票