《MakeMoney》投資GameFi真係咁好搵？網民：秒棄The Sandbox

 　　最近加密貨幣熱話，就係個個都開始參與Game Fi(Game finance)投資，其中有名嘅Game Fi遊戲「The Sandbox」係上月尾開始公測，而且呢個遊戲嘅遊戲幣「Sand Coin」炒高之餘，遊戲內嘅地皮都越炒越貴；不過有玩家反映，入去隻Game唔使五分鐘立即放棄，究竟Game Fi會唔會一個大伏呢？

 

 

Game Fi邊打機邊賺錢，遊戲幣可換可炒

 

(Shutterstock圖片)

 

　　所謂Game Fi即遊戲內嘅遊戲幣使用區塊鏈技術，賺取嘅貨幣可以係公開加密貨幣市場自由買賣，而遊戲幣本身有固定發行量，加上大家都有「Play to earn」（玩住賺）心態，所以近期唔少Game Fi幣越炒越有，當中最有名、連登話題最強嘅就係「Sand Coin」啦！而呢隻加密貨幣從八月約0.051美金，炒到歷史新高約8.4美金，升幅高達163倍，所以大家都覺得Game Fi將會推高加密貨幣市場估值嘅其中一個好辦法。

 

　　除此之外，遊戲內唔少物件都可以造成NFT，用以單個出售，好似神裝神劍咁；不過最誇張嘅，就係遊戲內嘅地皮，據了解係Sandbox宇宙入面，有大約1.6萬人買左佢地嘅地皮；而虛擬房地產同其他數字資產公司Republic Realm就以天價430萬美元，買入其中一塊Sandbox地皮。現實地球嘅地皮買唔起，以為虛擬世界可以買到，點知到最後都係被人炒高晒。

 

The Sandbox為沙盒類遊戲，連登仔：完全唔知玩乜

 

 

(網上截圖)

 

　　其實「The Sandbox」係沙盒類遊戲，意指遊戲變化度好高，可以自由係入面進行建設，以及發明不同嘅玩法，好似「MineCraft」咁就係最佳例子啦！不過「The Sandbox」係香港時間11月29日晚上九時開始公測，不過當晚開始公測無耐，官方網頁就立即進入「維修狀態」，直到接近晚上十時先重開。

 

　　而有連登用戶試過Down嚟玩，「完全唔知玩乜」、「秒棄隻驚（Game)」，有部分玩家表示，Game畫面雖然係「高清嘅16bit遊戲」，但對於玩開三A大作嘅人就覺得呢隻GAME相當之悶，完全無咩可能捱到十五分鐘咁話！事實上，當遊戲公測當晚，大家都滿懷期待入Game，而Sandcoin亦曾經炒高過上7.8美元；不過水退就知道邊個無著褲，當唔少玩家反映過相當之悶之後，幣價都慢慢開始回落，今日暫時報6.32美元，跌6.27%，對比起歷史高位更大跌兩成四！

 

係泡沫定係Scam？GameFi重點在於線上用戶！

 

(Shutterstock圖片)

 

　　總之係The sandbox入面嘅奢侈品，下下都萬萬聲，最近成交一隻Game入面嘅遊艇，成交價為65萬美元，係遊戲內除左地皮以外最貴嘅NFT。呢隻「驚」好似成為一部分人炫富嘅工具，但有人不禁會問，究竟加密市場係一個大泡沫定係Scam？又或者20年後虛擬世界所有野都升晒值，你就會後悔今日做咩乜都唔買。

 

　　其中遊戲講到尾重點，都係整體線上用戶數目，同埋用戶黏貼度，以及用戶上線時間。如果一隻遊戲做得好，經常維護及更新，確實係會吸引到一批忠實客戶；先不論呢隻遊戲耐玩性，剛剛公測已經搞到滿天神佛，而且幣價同NFT價格已經貴到唔合理，而家再入場係咪只係「接火棒」呢？咁就拭目以待啦！

 

撰文:李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇】卓林普經優才計劃成為香港居民，桌總冀當局放寬16歲以下青少年進入桌球室限制助年輕人接觸桌球，你是否認同？► 立即投票