2021-12-15
《MakeMoney》虛幣騙案避無可避，三大常見手法你識幾多？
近月幣圈真係死氣沉沉，幣價大跌不在話下，原來呢期都好多人受騙案之苦，由於加密貨幣有匿名性特點，所以就算被人呃左都無得追，係連登討論區有唔少巴打都訴苦，話自己辛辛苦苦炒幣炒左幾十萬都被人偷晒，真係聽到都覺得陰功，所以今集《MakeMoney》就同大家講下常見嘅加密貨幣幣騙案方式，等大家避免蒙受損失啦！
12 Phrase等於密碼，亂咁俾人必然損失
（Shutterstock圖片）
要購買加密貨幣，主要有兩個方法，一個就係去交易所，例如火幣、幣安等；另一個就係去中心化交易所，例如Uniswap、Shibaswap等，通常要去呢種地方買，就先要有一個加密貨幣嘅電子錢包。將電子錢包連結入呢類Swap，咁錢包入面嘅錢就可以係Swap入面使用，不過呢個都係一個好大嘅陷阱！因為將錢包連結入網站，主要係透過掃描QR CODE方式就得，而有釣魚網站就會設計一個同正版Swap好似樣嘅「假Swap」，要求用戶將錢包嘅12個Phrase輸入來連結錢包。
大家緊記，錢包連結Swap只會要求掃QR CODE，而係唔會輸入12個Phrase！因為呢12組生字等同你嘅銀行戶口同密碼，就算銀行職員都唔會向客戶要求密碼啦？所以謹記，如果去到一啲網站要你輸入錢包嘅12個Phrase，就必然係欺詐網站！
空投一定筍？小心會中伏！
（Shutterstock圖片）
另外一個常見技倆，就係空投啦！其實就係好簡單咁，要你搵幾個朋友，一齊輸入自己錢包條Hash俾個網站，邀情得越多、空投數目就會越大，當佢倒數完就會話直接將隻Coin入落你錢包，呢種Coin通常買入價都係幾毫子一粒，但聲稱只要一上市就會升到二百蚊美金，真係識就笑死，唔識就嚇死。
呢種騙局其實就係想利用人嘅貪念，因為空投肯定係假，佢目的係人參與預售（Pre-Sale），用一蚊價錢可以買到一百蚊嘅野肯定心動啦！但最後佢只係一款Rug Pull幣，只可以買入唔可以賣出，當賣到咁上下，個網就會消失，買入堆個堆幣就自然變成「紀念幣」，紀念下自己貪心嘅後果。
錢包突然多左款幣，要俾錢解鎖先賣得！
（Shutterstock圖片）
相信大家個電子錢包，會突然無啦啦多左幾款幣，例如「Minereum BSC」或者「Zepe.io」其實呢類幣都係欺詐虛擬貨幣，如果你想賣走呢堆幣，不過有唔少限制條件，例如你要俾解鎖費，或者你要先買另外一款抵押幣，先可以按一定比例率去沽走呢堆空投幣，當然呢堆空投幣沽走之後，你先發現自己都係蝕。
所以見到自己錢包無啦啦都左種幣，就唔好以為真係天降橫財，分分鐘都係一個騙局，無非都係想利用人嘅貪念，最後先發現原來係款毫無用途嘅幣，真係得不償失。
撰文:李皆穎
《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。
想要獨家投資理財Tips？即Like etnet 全新Facebook專頁► 立即讚好
