政府突然宣布將長者綜援申領嘅年齡調高到去65歲，令到一班60至64歲嘅老友記每個月無咗三份一綜援金之外，更加要出去嘗試搵工做先可以符合申領資格。呢個政策喺政府庫房近年滿瀉到唔知點使嘅環境之下，自必然畀全港市民鬧爆，除此之外特首林鄭月娥更加畀一班建制議員射到成背脊都係箭傷，幾咁口硬最終都要半跪低。

　　Tina聽聞自從政府公布今年2月落實有關新政策之後，建制派對於林鄭嘅不滿都仲未去到頂點，但當林鄭喺上星期答問大會一句：「你地係有份批准㗎！」建制派特別係涉及直選嘅議員同政黨，全部都進入抓狂狀態。據聞自從答問大會之後，唔少建制派紛紛去西環訴苦，有人更加大數林鄭不是，而由於「進言」者眾，逼令西環要出手化解今次可大可小嘅政治風波。

　　有親西環人士透露，今次綜援事件林鄭的確係站喺「理」嘅一方，佢堅持佢嘅睇法亦都係合「理」，亦合乎政府嘅程序，但林鄭最大嘅問題，係無諗到兩個「情」。

　　第一個「情」係選情，今年就係區議會選舉嘅選年，削綜援事件本身都唔係致命傷，但係林鄭喺立法會嗰一句，真係嚇到一班區佬腳都軟埋，因為唔少市民已經開到口問佢地點解要支持政府傷害老人家。大家要知道，香港兩個大選對於西環來講係向北大人交差嘅頭等要事，任何差錯都會有人「人頭落地」，任何影響到建制選情嘅事，西環都一定要諗計阻止，呢件事如果任由繼續發酵，後果可以不堪設想。

　　第二個「情」係建制泛民之「情」，講緊係成件事令到建制同泛民罕有咁全體站喺同一陣線，同政府(林鄭）對著幹，呢個亦係西環唔想見到。西環嘅其中一個政治任務就係聯繫所有愛國愛港陣營，最好就當然係統戰到反對派，統戰唔到都要打壓反對派，但今次事件竟然將建制同泛民連成一線對抗政府，試問西環又點同阿爺解釋？就係呢兩個「情」，逼到西環要喺呢件單統嘅香港民生事務上要插手，要求林鄭搞掂佢，所以林鄭幾打得都好，今次肯定打唔過建制派要讓步。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

想要獨家投資理財Tips？即Like etnet 全新Facebook專頁► 立即讚好