【職場求生記】會議室內最易受同事攻擊？3個說話技巧助你轉危為機

　　無論你做乜嘢行業，身處邊一個職場階段，說話技巧永遠都係工作最重要嘅一環。好多人工作能力不足，但只要語言能力高，往往都能夠比其他人跑得快。語言能力喺會議室更為重要，因為公司嘅會議室內係藏著最多攻擊、指控同埋伏嘅地方，但同時間亦有好多機會。如果能夠掌握到好嘅說話技巧，除咗能夠救你一命，甚至可以轉危為機。

 

1. 將無理指控變成攻擊

 

　　多數人面對指控時，不論指控有理定無理，都會因為受情緒影響而未能好好作答，尤其係突如其來尖銳嘅攻擊，根本來不及思考，如果喺職場上未夠老練的話，最後點答都死。

 

　　當面對無理指控時，雖然明知對方嘅指控並無理據，但對方能夠喺眾人面向你對提出指控，必定有某啲「好似」好有道理嘅論點。所以大部份人嘅反應，一係死頂或者硬食，一係就理直氣壯地作出反擊。但其實呢啲方法都未必係最好嘅回應，就算畀你反擊成功，亦可能會破壞咗會議上嘅氣氛，影響眾人對你嘅觀感。

 

　　所以第一個反應毋須急於解釋或者還擊，反而最簡單直接嘅溝通方法，就係將指控變成問句，嘗試不斷提問，除咗能夠擋下攻擊之外，亦令對方自己露出馬腳，極有可能將指控變成反擊。另一方面，問句能夠令你深入了解指控嘅根源問題，之後用問句引導對方朝向你嘅思路為自己策局。

 

同事A：「項目delay咗一個月，你哋team要負起大部分責任！」

同事B：「主要delay係邊個事項？據了解，我哋team所有事項經已準時完成。」

同事A：「呢個我要問番先知，但delay係一定。」

同事B：「如果連你自己都唔了解，咁比較難清楚明白真正問題嘅根源。亦有可能係因為『其他team』對事項了解不足所致。」

 

2. 減去負面字眼

 

　　喺會議上討論時，因為組與組之間嘅角色問題，各自無形間都會建立咗一道「保護牆」，對話間冇意識地加入好多負面字眼，例如「唔得」、「好差」、「好有問題」等，令到普通一句話聽落都唔太順耳，甚至令人感到被攻擊。破壞會議氣氛之餘，亦影響別人同你嘅印象。

 

　　就算無可避免地要表達負面嘅訊息時，除咗可以將論句變成問句，令對方明白自己嘅不足，亦可以用其他字眼去取代負面字句，表達意見時亦大方得體。

 

X 「你份Proposal根本冇論點。」

√「如果呢度有再深入嘅論點同支持理據，成份proposal就會更加好。」

 

X 「呢件產品嘅價值好低，你哋team嘅定價方針好有問題。」

√「建議呢件產品需要重新定位，令定價更切合產品價值。」

 

3. 多讚賞，借力打力

 

　　喺亞洲人嘅傳統文化下，讚美別人係一件好難嘅事，就算玩facebook，香港人比like 都係特別孤寒，而呢種文化喺職場上更甚 。就算同事做得幾好，都極少會大方地稱讚對方。但如果能夠適量同適當地「使用」讚賞，其實係好好用。當對方提出真心不錯嘅論點時加以讚美，除咗顯得你大方之餘，亦可以喺對方嘅論點上追加你嘅睇法（當然唔係執人口水尾），借力打力，順勢而行，係一個協同效應（synergy）。

 

　　但要緊記，以上嘅方法要小心使用，為問而問，為讚而讚，反而會弄巧成拙。

 

　　其實同事們可以出現喺同一個會議室，即代表大家係坐同一條船，一齊解決／完成嘅同一個工作。雖然明白組與組之間必定有好多問題，但如果大家能夠將「鬥爭」變成「競爭」，將「對其他人嘅攻擊」變成「對工作上嘅攻勢」，每個會議都會變得更有意思。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

第九屆「傳媒轉型大獎」請投etnet經濟通一票！► 立即行動