《魚缸博客》稱霸美國嘅Costco，點解喺中國打不過山姆？

　　《魚缸博客》前排復活節假期，好多香港人北上深圳掃貨，山姆超市人山人海，逼到爆廠；但另一邊廂，同樣係美式倉儲式超市嘅Costco，人氣似乎爭一截。有朋友問：Costco喺美國咁威，全球零售巨頭，點解嚟到中國就打得咁吃力？

　　睇數字你就明。截至2026年第一季，Costco喺中國內地只係得7間門店，集中喺上海、蘇州、杭州、寧波、南京同深圳。自2024年開完南京店之後，成兩年幾都冇新店開過。反觀山姆，截至2026年5月已經有67間門店，今年仲要再開13間。7間對67間，呢個差距，唔係一般嘅大；銷售數字更加嚇人。2026財年，山姆中國全渠道銷售額突破1400億人仔，會員數突破1070萬，單係會員費一年就收近30億。Costco中國呢？銷售規模約100億，付費會員估算得150萬至200萬。山姆嘅體量，係Costco嘅十幾倍。

　　點解會咁？

　　第一，入場時機決定命運。山姆1996年就跟住沃爾瑪入中國，到而家30年，慢慢摸透咗中國市場嘅遊戲規則。Costco呢？2019年先至喺上海開首店，遲咗足足23年。當年山姆已經用咗23年時間教育咗中國消費者咩叫「會員制倉儲超市」，Costco先嚟到，等於入場嗰陣人哋已經起好晒圍牆。

　　第二，經營哲學完全相反。有分析話，山姆做嘅係「加法」，Costco做嘅係「減法」。山姆加咩？加門店、加前置倉、加App、加到家、加本地鮮食、加即時履約。佢哋明白中國消費者要嘅唔單止係「平」，仲要「快」同「就手」。

　　第三，線上能力天淵之別，呢個可能係最致命嘅差距。山姆2020年就開始搞「極速達」雲倉戰略，到而家全國前置倉同雲倉超過500個。80%嘅訂單可以1小時內送達。線上銷售佔比已經突破50%。Costco呢？直到2026年5月20日，先至首次入駐京東開官方旗艦店，配送時效仲要係3日左右。一個係「1小時到」，一個係「3日到」，你話消費者揀邊個？有零售從業者就話，Costco嘅線上履約半徑只係覆蓋門店周邊，冇前置倉網絡，好難滿足城市家庭高頻即時補貨嘅需求。

　　第四，供應鏈本土化輸九條街。山姆嘅商品，超過80%已經實現本土採購。佢哋行嘅係「全球採購+本土化生產」雙軌制，用獨家開發形成商品差異化。Costco呢？核心品類高度依賴進口，進口牛肉、堅果等商品要承擔15%以上關稅同高昂運輸費，售價比有本土供應鏈嘅同類商品高出10%至20%。貴過人，又冇人咁方便，點鬥？

　　有評論講得好：Costco真正嘅問題，從來唔係開得慢，而係低毛利模型同中國速度之間存在衝突。入華7年得7間店，會員續卡率得60%-62%，遠低過全球平均90%。呢個唔係偶然，而係一套喺美國行得通嘅商業模式，搬到中國之後嘅必然結果。

　　當然，Costco最近開始「補課」－－入駐京東、推雙軌會員制。但係咪追得返？睇怕難。山姆用30年砌出嚟嘅護城河：門店網絡、前置倉體系、本土供應鏈、千萬會員，唔係一朝一夕可以超越。所以下次你問「點解Costco喺美國咁威，嚟到中國就冇咁掂？」答案好簡單：美國嘅冠軍，唔代表打得贏中國嘅主場。

《編者按》本欄搜羅即市傳聞，惟消息未經證實，《經濟通》亦不保證內容之準確性。