《小傳日記》無綫集團唔係無錢集團！愛回家變AI劇即有20億科水？

　　《小傳日記》TVB(00511)近期宣布改名叫「無綫集團」！有網民就話自己一時眼矇矇，睇錯咗做「無錢集團」，不過睇番財報，上年TVB賺咗5929萬元，亦係近年嚟首次轉虧為盈，截至上年底都有接近8億現金，睇嚟都唔係冇錢嘅。「無綫集團」呢個名吉唔吉利筆者答唔到，但好肯定TVB甩咗「電視廣播」四個字之後，未來會繼續不務正業搵銀兩！

　　事關改名之後幾日，無綫就宣布同基滙資本合營一間公司做「提供人工智能相關用途的算力服務」，基滙將會向合營公司注資20億，後續仲有機會認購TVB新股，呢次仲有邊個敢講「無錢」？

　　TVB會喺電視城入面興建一座數據中心，雖然冇講過要拆卸現有嘅建築物，但係唔少網民都覺得TVB會拆咗部分廠景，講得都冇錯嘅，TVB自製劇已經買少見少，尤其係古裝劇幾乎絕種，至於同內地影視平台合拍嘅劇集就直接北上搭景，以後如果有劇組真係需要搭景但冇budget嘅，咪AI囉。

　　為咗說服投資人科水轉型，TVB呢兩年大張旗鼓搞AI，挑戰自家觀眾慣性收視極限！由上年年尾開始，TVB就已經喺深夜時段播放自家製嘅AI微短劇，乜嘢類型都有，校園青春、愛恨情仇、懸疑驚慄都有，就連情慾戲碼都有AI生成到出嚟，效果其實「膠膠地」，但因為深夜時段播放，坊間討論唔算好多。

　　不過到咗今年，TVB嘅AI風潮終於殺到入黃金時段。TVB王牌處境劇《愛．回家之開心速遞》居然宣布要BBQ大結局，之後臨時臨急推出愛回家新系列《三代同糖》，唔少忠實粉絲大感不解，《開心速遞》明明係TVB嘅收視保證，好多角色已經深入民心，點解唔繼續添食？直到《三代同糖》開播之後先發現，新劇部分場口竟然係綠幕拍攝，事後再用AI動畫key成背景，認真慳皮！而最具爭議一幕出現喺第三集，其中一幕講述由車婉婉飾演的母親去一間西餐廳尋找個女，但餐廳景竟然要靠AI生成，仲要畫質極膠、光影錯亂、背景食客唔識郁，效果十分詭異，本土網民狠批場景似售樓書概念圖，內地網民就話好似睇緊《都市笑口組》（內地粵語趣劇節目）。

　　因應新劇嘅AI爭議，有娛樂版記者亦翻炒上年TVB嘅父親節廣告正正係全AI製作，甚至係喺疑似無通知劉丹嘅情況下，用AI生成「流丹」參與廣告演出，事後亦無計返show錢畀「堅．劉丹」，傳聞激到劉丹當眾爆seed管理層。近日劉丹就回應返，當日係因為監製「病咗」先計慢咗show錢，病好已經即時跟進返。

　　丹爺本人都已經「80歲後」，無得過檔新處境劇，假如仲要大動肝火先攞得返show錢都幾慘。但其實TVB打算行AI之路，除咗跟風，當然都係為慳錢打算，假如之後黃金時段劇集都可以由AI演員做男女主角，更加可以慳多筆。不過好似今次劉丹嘅「AI VS 真人」之爭，早喺幾年前荷里活嘅編劇工會同演員工會已經發起過大罷工，要求資方喺AI普及後要確保演員同編劇不被取代，如果TVB AI劇繼續推進，本身底薪微薄嘅職藝員未來只會更難捱。

　　目前TVB同基滙簽嘅係「協議綱領」，同「備忘錄」一樣不具約束力。TVB公告提到會爭取同基滙喺今年下半年簽署正式協議，到時20億嘅AI發展入場券先會正式交由TVB負責。不過由《三代同糖》嘅例子可以睇到，如果用嘅AI模型唔夠強，生成內容就唔夠像真，亦會令觀眾覺得唔夠誠意，短期TVB可以受益，但長遠而言都只會畀其他AI影片平台取代。所以TVB要繼續AI之路，喺生成內容質素上要交到貨，咁先係對觀眾有交代，亦都係對投資方嘅交代。目前TVB都仲可以同大水喉講正因為而家套AI未訓練得好，更多需要呢20億嚟提升訓練效果，但假如使咗20億，主角都仲係出現三隻手，咁就對邊個都交代唔到，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。