《魚缸博客》足球明星點樣賺錢？唔怪得個個都搵足球明星轉會！

　　《魚缸博客》世界盃就快到尾聲，呢次世界盃最好睇，唔係決賽，而係英格蘭打法國，英法百年戰爭都未打出個輸贏，世界盃又可以複製多次，所謂「打贏去差館，打輸去醫院」，呢鋪肯定打交多過打波，世仇呢家嘢真係幾時都咁精彩。

　　不過博客今日並唔係想講波，而係想講足球員。大家都知道有名氣足球明星都賺到七彩，但究竟佢地係點賺錢呢？博客都研究過下，睇返最近一年十大運動員收日，人稱「梅建國」的美斯年收入有1.4億美元排第三，而「丙朗」就繼續奪冠，年收入有三億美元。

　　足球明星收入係有分「場內」同「場外」，多數都係「場內」為主，大多數人聽到咩「轉會費」，其實係唔關球員事，係球會同球會之間交易，即係球員係貨物，買賣個份合約；而足球員呢？就係收人工的，多數係用「周薪」計算，呢個就係組球員「基本薪資」，另外就係獎金啦，例如入一球有幾錢，罰球助攻入波有幾錢，十二碼入到波有幾錢，每一筆數都有得計。

　　而場外收入，最基本就係廣告啦！仲有就係明星俏像權出售，波衫出售分紅之類。有趣嘅係，「梅建國」同「丙朗」明明人氣都係相當，但點解一個年收入三億，一個得1.4億呢？關鍵在於，「丙朗」去沙特踢，佢地大油國有錢，用錢去起個超級聯賽，等有更多人睇，有話題性。

　　其實都有人搵過「梅建國」去沙特踢，仲開到貴一貴，但轉個頭梅生走左去美國「邁阿密國際」，有錢都唔搵？非也，其實係邁阿密國際俾左一個更吸引的OFFER--期權，據市場消息透露，梅生退休之後，可以獲分邁阿密國際期權，到時梅生兌換之後，正式變成邁阿密國際老細；而邁阿密國際另一大老闆，就係碧咸。

　　即係話，就算梅生退休，佢個名氣依然留係球會，只係由球員變成老細，而梅生又可以有權組職球隊、指點江山，所以佢拎住呢堆期權，未來可能價值幾個億甚至十幾億美金，真係唔自在沙特個小小出場費。只要球隊名氣愈來愈大，估值愈來愈高，球隊搵到更多錢，美斯堆期權就更值錢，簡直就係雙贏。

　　據聞沙特都想用呢招留住「丙朗」，係咪真就睇「丙朗」肯唔肯再續約啦！

《編者按》本欄搜羅即市傳聞，惟消息未經證實，《經濟通》亦不保證內容之準確性。