《魚缸博客》國內機械硬盤橫空出世，撕開美日40年壟斷僵局

　　《魚缸博客》但今年8月15日，深圳搞咗個「2026首屆機械硬盤技術論壇暨產業大會」，主角係一間叫大數極限嘅公司。佢哋展示咗一款叫PMD嘅機械硬盤原型樣機。有幾勁？帶寬提升21倍，隨機讀寫性能提升高達千倍，成本仲預計大幅降低。

　　點解做到？因為佢哋用咗一套叫M3嘅全新架構，徹底顛覆傳統HDD技術體系。仲結合咗清華大學嘅「結構超滑技術」，傳統磁頭要喺盤片上面飛，高度幾納米已經係極限；結構超滑技術令磁頭可以接觸式讀寫，理論上打開咗儲存密度同讀寫速度嘅新空間。

　　博客點解會介紹呢樣東西？因為全球HDD供應緊張到一個點，大摩話，HDD供應事實上已售罄至2028年，長期供應協議甚至傾到2031年。西部數據、希捷全年產能，基本被AI數據中心客戶預定一空。每TB價錢由舊年幾十蚊，衝到目前200蚊人仔。

　　而因為全球機械硬盤市場，就係得三間公司玩晒：美國希捷、西部數據，仲有日本東芝。三間加埋揸住全球約八成產能。而中國呢？每年HDD消費規模接近600億人仔，但全部靠入口。

　　其實中國唔係冇試過造機械硬盤。1999年，長城集團推出中國第一塊自主生產嘅機械硬盤，8.6GB。次年上市，單月銷量突破5萬塊。但因為缺乏核心技術，質量問題頻發，被迫轉做代工。2001年成立易拓品牌，用咗IBM嘅「高密度玻璃盤片技術」，點知呢個技術本身有嚴重缺陷，搞到壞道頻發、返修率極高。結果IBM硬盤業務崩潰賣俾日立，易拓都跟住玩完。由1999到2007年，短短八年，國產機械硬盤「曇花一現」。

　　但長線嚟講，呢個突破嘅意義好大。AI浪潮下，HDD市場一啲都冇萎縮，反而愈嚟愈大。2025年中國用於AI訓練同推理嘅數據總量達到199.48EB，增長42.86%。數據中心超過八成嘅數據仲係靠HDD保存。SSD同HDD唔係替代關係，而係分層協作：高頻數據用SSD，海量溫冷數據同備份歸檔，始終要靠HDD。

　　呢個就係國產HDD嘅機會。如果大數極限真係能夠將PMD產業化，唔單止可以撕開美日40年壟斷，仲可以食正AI儲存呢條大賽道。

　　從1999年長城第一塊國產硬盤，到2026年大數極限PMD原型機，27年過去，中國終於再次叩門。今次唔再係「引進-模仿」，而係底層技術原理嘅突破。雖然量產仲要幾年，但至少，嗰道比長城仲厚嘅壁壘，終於被撬開咗一條罅。對於投資者嚟講，呢條賽道值得望多兩眼。不過記住：原型機還原型機，量產還量產。等真正出到貨、攞到客戶認證，先至係兌現嘅時候。

《編者按》本欄搜羅即市傳聞，惟消息未經證實，《經濟通》亦不保證內容之準確性。