兩個人在一起代表甚麼，拍拖多年又怎樣，或者最後「甚麼都不是」？

　　「我有時都好迷惘，唔知同佢算點……初時我以為未係時候，或者佢想專心工作，但最近先發覺佢好安於現狀。」和她正吃著下午茶的糕點，她卻急不及待的訴苦。

　　「我一同佢講將來，佢就即刻唔出聲，更加唔好講人生計劃、藍圖有無我啦！或者佢只係享受拍拖，唔會行多一步。」她嘆了口氣。

　　「拍拖無責任嘛，幾好㗎！」我笑著說。

　　步入這適婚年紀，拍拖已不只是為了開心、玩樂，該是講將來吧，然而她都三十好幾，和男友拍拖近三年，他依然一副未想定下來的模樣。

　　「想結婚嘅係我地，但男人只想停留喺拍拖！我覺得佢唔會諗咁遠，結婚要洗錢，多一事不如小一事啦。」她接著說：「喺屋企有阿媽照顧，食好著好，飯來張口，飯後睇電視，家務完全唔駛做，唔駛煩，好好㗎！」

　　「拍拖係最簡單、最慳錢嘅關係嘛，唔需要離開comfort zone，一講將來、結婚，複雜幾多呀！」我毫不客氣的說。

　　Be a mother’s boy，和家人一起住有多好，省錢省力又省心，何必走多一步，是女人對婚姻有所期待，但男人不會呀。30多歲繼續拍拖，做個中年黃金單身漢都不錯，閒時有拖拍，有人陪，節日足以和親戚家人交待。結婚可煩了，要買樓、供樓或租樓、水電煤、家中雜費支出，樣樣都是錢，背負著婚姻一輩子的承諾，是多了個身份，更多了份責任和經濟壓力啊！而拍拖關係便全然不同了，有人相陪、聊天，weekend約會、玩樂、吃個飯、逛個街，依然能談情做愛，之後say bye各自回家，不用煩，不用想太多，最多只是請客食飯，輕鬆得很。不談將來，無需計劃、無需負責，只求開心，拍拖是最好的狀態，結婚能算便算。

　　「佢初時同我一齊，話以結婚為前題，但宜家係『完全唔提』，或者得我自己一個發夢。」她接著說：「佢對上一個女朋友拍左5年，最後都係分手，或者佢一直只想拍拖，上一個係咁，宜家都係咁！」身為苦主的她連苦笑都難。

　　人總是犯同一個錯誤麼，是類似的過去，證明他就是如此的一個人？突然明白為甚麼不少情侶經過愛情長跑卻走進了分手，是女的想婚，男的卻一直不婚？拖得久了，女方由一開始的寄望，後來也等到放棄。

　　「或者女朋友只係生活的必需品，人有我有，反正一齊得耐，你又最就手，佢都懶得再搵個新嘅……繼續咁咪算囉。」

　　看著別人成雙成對，自己也不能落單，女友總比朋友好，朋友可不是常常有空，有拖拍、明正言順的有人陪，有甚麼不好，慣性的拍拖也就繼續拍拖，沒然後了。

　　明知女友想婚，卻不肯多說半句，行前或後退也該交待吧？這種男人是在浪費女人青春麼，我不懂，但要是早就沒有結婚的念頭，情願大家開宗明義，早說清楚，早有共識，要麼就接受兼繼續一起，要麼就各自開心、騎牛搵馬找個更好的，免得被一直拖著，最後卻是一場落空。