周一(7日)全國人大常委完成釋法，正如Tina上周所講，釋法雖然只係涵蓋了《基本法》第104條有關宣誓嘅條文，但全國人大常委會副秘書長、基本法委員會主任李飛喺記者會上就作出了更廣泛嘅演繹，係要全面封殺港獨自決派嘅香港嘅政治生存空間。

　　釋法內容已經廣泛討論，呢度都唔再講，不過Tina想講一講今次釋法事件，見到我哋嘅特首CY梁振英，展現咗佢最擅長、最具魅力嘅政治家一面。CY把握住兩位愚蠢、無知議員的辱華誓言，利用輿論打蛇隨棍上，先喺香港入稟司法覆核要凍結兩人嘅議席，其後更牽引出釋法。

　　釋法嘅效果唔單止係針對佢兩個人，而係要一次過將港獨自決連根拔起。據聞CY已經有晒全盤部署，將會有一連串行動，喺法院對梁游兩人宣判之後，亦會入稟法院質疑其他宣誓時違反釋法定義嘅議員，一次過KO佢地。梁游一下馬，只要再有多兩個非建制立法會議員都被DQ（取消資格），地區直選建制派議席就會佔多數；而由於處理補選需時，屆時建制派第一樣要做嘅就係出修改議事規則防止再有拉布。

　　近日有親政府報章報道，話CY喺內部會議講過，中央政府好重視港獨問題，23條可能好快立法，甚至「快則今屆政府就要做」。大家都可以睇到，呢位政治家係幾咁識得把握機會，把握敵方一次漏洞，將整個形勢扭轉，更加將先前喺佢身上嘅幾個政治炸彈，包括橫州問題、阿爺遲遲唔撐佢連任等等問題，都轉移到去港獨議員身上，完美咁主導埋香港輿論。如果真係搞掂埋23條立法，真係頒個「平亂大功臣」畀佢都不為過。

　　喺來年特首選舉之前，CY成功咁喺阿爺面前展現佢政治魅力，毫無疑問，大大增加咗佢連任嘅本錢。CY稱得上係回歸以來香港最「出色」嘅政治家；無論你係支持定係憎到佢入骨，CY嘅政治CP值，都應該係全港最高。