主張台獨的「時代力量」立委黃國昌牽頭成立「台灣國會關注香港民主連線」，香港立法會議員朱凱廸、羅冠聰同陳志全齊齊出席成立儀式，引起「台獨」「港獨」勾結之疑，引發軒然大波。雖然三位議員都否認自己主張「港獨」，有關組織亦只係就人權事宜進行交流，但係三人嘅動作，已經挑動到阿爺嘅主神經。

　　Tina收到風，今次三位推動「自決」嘅議員出席「台灣國會關注香港民主連線」成立儀式，喺上周末已經觸動到北京。親北京消息就話:「唔肯定係唔係習大大下嘅指令，但來自中央極高層嘅訊息，今次事件已『震怒』中南海，講明要動員全體力量，要全面封殺呢類『播獨』行動」。《環球時報》好早就已經發文炮轟三位「播毒」議員，而呢道北方最嚴肅嘅指令，經中聯辦送達建制派耳中，建制派先如夢初醒，噚日(15日)39人先至齊齊整整見記者聯署譴責。

　　以噚日咁嘅陣勢，相信今次「反獨」攻勢會一浪接一浪，包括建制派正醞釀嘅立法會搞場「大龍鳳」，暫時未知會透過緊急質詢定係動議緊急議案，甚至係成立專責委員會去處理。不過，臨近今個立法會期近尾聲，重點都係有無時間去搞。

　　有建制派中人就話，將呢件事發酵可以收到一石二鳥之效。第一，顯示到建制派喺「反獨」立場上嘅堅決，位位議員可以喺立法會表態，以彰顯向阿爺效忠之心；其二，喺「浩鼎們」之後，建制派名譽明顯受損，再加埋有傳廉署已經立案調查事件，搞大「反獨」事件可以將焦點轉移，亦令到建制派拎返輿論主導權。

　　不過，呢件事仲有第三個效果。大家仲記得建制派同泛民主要政黨餐「和頭午餐」呢？呢餐飯完咗之後，有份出席嘅自由黨黨魁鍾國斌仲話，候任特首林鄭月娥希望修補社會撕裂，立法會亦有部分責任，希望飯局為林鄭月娥帶嚟示範作用。佢仲話，日後會再搵機會約埋其他獨立議員坐埋食大家再交流。有建制中人就話，呢餐飯只係短短一個月之前食，但之後發生「浩鼎們」，依家再加埋三名自決議員「勾結台獨」，令到建制派同泛民（非建制派）之間嘅裂痕仲深過大峽谷，相信對於林鄭所謂修補社會撕裂之說大添難度，「大和解」肯定係遙遙無期！