近年興講創新，港交所要創新，深交所同上交所都話要死跟一齊創新，似乎創新就一定係好。開創先河當然係好事，但創先河同壞先例，其實從來都只係一線之隔。遠嘅地方都唔講，單單睇香港，近來都真係創下幾個極壞嘅先例。

　　第一個壞先例係來自特首林鄭月娥。佢喺民主黨嘅宴會上面，拎咗三萬蚊去贊助前議員李華明高歌一曲，雖然林太Facebook到整個Hashtag#大和解，講到同民主黨有傾有講，但實在就係，佢呢個舉動真係有缺乏咗政治智慧、違背咗政治倫理。

　　林鄭作為特區之首，好應該係政治中立，就算有啲嘢係幫到出面，例如委任一啲委員會委員等等公職偏重於某一政治勢力，但最起碼，的確係唔應該涉及金錢瓜葛。有人可能會話：「唓，咁每個黨都捐返三萬蚊咪可以Super，打和囉！」咁樣做就更加係無政治智慧，因為之後嘅政黨亦只係跟住民主黨尾巴，你話其他政黨又點會甘於做呢個配角？所次今次豪捐三萬，第一個反效果就係令到建制派無「飛士」。

　　第二個反效果，係極可能影響到佢嘅政治前途。有建制派同Tina講，林鄭捐錢畀公民黨可以，捐錢畀其他溫和泛民都無不可，但捐畀民主黨就係唔得，仲話好可能有人會向阿爺告狀。告狀？大和解喎，統戰喎，告得乜？呢位建制派就話，人大常委譚耀宗都已經開聲試水溫，話高呼「結束一黨專政」嘅人好可能係違反憲法同基本法，甚至可能唔可以選立法會，而民主黨入面就有唔少人係支聯會嘅中堅份子，林鄭捐錢畀民主黨，咁即係點……

　　另一個壞先例就剛剛喺今日發生，就係財爺陳茂波最終頂唔住壓力，要向未受到派糖政策惠及嘅「無產」階層，派發四千大元。點樣派呢度唔再講，但一直堅持唔派最終又派，同財爺之前嘅講法，再加埋林鄭初期高度評價《預算案》，話《預算案》充分反映佢嘅理財哲學，形成一個強烈對比。可以預期，未來幾年陳茂波將會成為一個「無牙財爺」，一到《預算案》就驚自己派唔夠畀全城唾罵，派錢將可能成為常態。只要鬧就有錢派，呢個壞先例對香港嘅影響先至深遠呀！