九龍西第二次補選周日塵埃落定，由「三次唔認係建制」嘅陳凱欣擊敗泛民李卓人當選，重演鄭泳舜打低泛民嘅一幕。

　　選完之後，問責泛民之聲四起。有泛民支持者（包括李卓人自己）繼續批評馮檢基鎅票，又有人話泛民多年來不思進取、食老本，吸唔到新生代票源，搞到今時今日咁樣真係自己拎嚟。但點講都好，從兩次九西嘅補選，有兩大啟示，的而且確係泛民需要認真面對。

　　第一次補選，姚落敗，有人話佢選舉工程「離地」，無用到傳統選舉嘅策略，即係大開街站、洗樓等等。OK，咁剛剛呢次又點？乜都做足了，連泛民大佬都齊齊出來拉票了，結果李卓人同馮檢基得票總和同姚松炎不相伯仲，呢個就顯示出，泛民係老態龍鐘，基本盤係咁多就係咁多，含淚投票嘅遠遠多過無私支持，無少到票已經要開香檳，遑論話可以開拓後生仔嘅票源。

　　呢個啟示帶出嚟嘅後果對泛民極為不利。兩次選舉之後，Tina聽聞已經有建制派提出研究將選舉改返為單議席單票制嘅可行性，因為非建制嘅票源已經劃咗兩份，每一份都唔會投去另一邊，變相對建制有利。建制喺呢兩次選舉之中亦都見到泛民散過散沙，所謂合作只具形，根本就唔似建制咁齊心咁實在，若果日後立法會直選轉做單議席單票制的話，淨係泛民協調出選已經令佢地頭痛，所以建制派私底下傾呢個建議，都唔係無的放矢。

　　另一個啟示係泛民流失中產票源嘅速度係非常可怕。睇返今次票站結果，公屋區敗陣，泛民歸咎於「蛇齋餅稯」都無可厚非，咁中產區你都無理由畀人大幅拋離呱？區內家庭月入中位數達到10萬嘅九龍塘區，票站嘅結果係陳凱欣得票近53%，而阿人只係得42%，呢個結果顯示出，建制派只要培植更多號稱中立、有活力嘅專業人士出選，就已經足夠搶到泛民嘅中產游離票，泛民未來選舉之路真係一片暗淡。

　　話咁快唔使一年就已經係區議會選舉，Tina唔使水晶球都估到，建制派將會大勝而回，呢個就係啟示。