今個星期香港政壇圍住法律界立法會議員郭榮鏗嚟轉。郭榮鏗喺立法會內務委員會主持主席選舉，拖足半年都未選到，成功癱瘓立法會運作，成為建制陣營同阿爺嘅眼中釘，更罕有咁遭港澳辦和中聯辦強烈譴責，並警告他或違反誓言和公職人員行為失當罪，稱得上係「罪鏗詔」。

　　有建制派人士就嘗試解釋「罪鏗詔」嘅來龍去脈。呢位建制派中人指出，郭喺內會興風作浪咗半年，中聯辦知唔知？早早就知；港澳辦又知唔知？唔知的話當然講唔通，立法會反對派一舉一動港澳辦都唔會亦唔敢有甩漏，所以好肯定，郭嘅所作所為早已觸怒北大人，估計建制權力中心亦一直有同北大人保持聯絡，睇下可以點樣拆咗呢隻「郭」。

　　咁點解拖到今時今日先下呢封「罪鏗詔」而唔早兩個月搞？建制中人估計，時間上係有幾方面去考慮。第一，新冠病毒疫情喺今年1月開始大爆發，大家集中抗疫期間，連內會都唔多開會，令到北大人「拆郭」有顧忌；其二，北大人喺疫情爆發期間，仍然係希望建制派生性，自行解決事件，但上至林鄭、下至大主席梁君彥同內會主席李慧琼仍然係苦無對策，大家又錫身驚被郭司法覆核，揀無可揀，港澳辦同中聯辦先要冒住被人質疑「干預特區政府內部事務」嘅指責，發出「罪鏗詔」。

　　Tina執筆之時，內會仲未開會，但估計李慧琼喺北大人出聲之下，一定會喺今日內會期間想辦法「拆郭」，唔咁樣做都對唔住阿爺一片苦心。但大家都明白，香港今時今日出現咁嘅對立局面，都係由逃犯條例而引起，而郭之所以能夠無視議會常規喺內會「搗蛋」，就係受到整個黃營民意嘅支撐。中聯辦港澳辦將矛頭咁樣指向郭，只係大大增加咗郭榮鏗、公民黨以至泛民反對陣營喺今年立法會選舉嘅本錢。Tina絕對認為，阿爺下詔罪鏗，絕對係棋差一著。