小心太陰化䘵與巨門化忌的孖必。

　　雖然新曆已屆十月，但舊曆仍有四個多月才到年尾，所以丁酉年的玄學效應仍然有排洶湧,照樣影響你和我。

　　從紫微斗數的角度看，丁酉年太陰化䘵，即旺女人或太陰坐命的男人（樣子斯文、態度溫柔、好有女人緣嗰款呢），但同時有巨門化忌，會應在是非、口舌、訴訟、官非……等。

　　由於太陰化䘵與巨門化忌一定行孖必，所以雖然女人容易上位，可能搵多D錢，但亦有陰暗面。

　　女人當旺的例子很多。遠的有德國默克爾大媽，竟然一洗年初頽勢，新鮮滾熱辣連任總理；近的有林鄭成為香港首位女揸弗人。刷新特區歷史。

　　但成功背後有暗湧。

　　雖然默克爾砌低對手，但僅是慘勝，刻下籌組政府，要延攬左、中、右的黨派，難度極大，就算勉強湊集成軍，將來執政仍舉步維艱。至於其他已掌權的女性，亦冇乜好日子過。蔡英文的民望與世界股市成反比，跌至歷史新低。緬甸昂山素姬則由民主女神淪為滅族幫兇，其國際聲譽直插谷底，有人叫佢嘔番個諾貝爾和平獎出嚟！

　　英國首相文翠珊更應晒巨門化忌的敗象，包括在演講時不順利，和咳到黐肺（巨門一星與喉嚨氣管有關），她在最近保守黨年度大會上致辭，點知狂咳至失聲，還有喜劇演員來「贈興」，遞上攪笑嘅偽造P45文件（僱主向離職員工發出的薪酬總結表），革職的理由是「既不強勢又不穩定」，諷刺佢就嚟冇得撈，最後連Backdrop佈景板的字都「不穩」，掉了下來。近來還傳她被逼害。

　　相對於這些政界英雌的灰頭土臉，林鄭尚算身光頸靚，但巨門化忌亦冇放過佢，最近因creatively用了「底氣」一詞，企圖為自己的演講加添「底氣」，惹來非議，變成谷氣。她在最近國慶酒會上，說了「深刻感受到來自國家的底氣」，即刻成為箭靶，被指採用大陸詞語「鸚鵡學舌」、「討好主子」。因言被轟，是典型的巨門化忌應法。

　　至於我地D平民百姓，又點應付呢？

　　女人呢，唔好上位就得戚，宜見好就收，同時留番條後路畀人同畀自己，因為當你事業下滑時，會遇番所有你向上爬時踩過嘅人。

　　男人呢，就唔好滾攪D女上司、女同事、女下屬，無lala唔好同佢地「捏」，因為始終今年女人「底氣」足D嘛！