有青春期的子女，就有焦慮期的父母。

　　筆者曾經在網上看過一條短片，內容大概講：有個男仔好奇又好動，因為怕父母反對，私下參加了泰拳班。十六歲生日時，同學仔開玩笑，送了盒避孕套給他，但他屬遲熟一群，愛打交多過愛性交。

　　一天，母親偶然找到兒子的避孕套，心中非常忐忑，於是小心翼翼地問兒子：

　　「今日我搵到你嘅保護措施，你有冇做……」

　　兒子以為母親找到他練泰拳時用的護陰，問他是否做打拳練習，於是坦白承認：

　　「係呀！每日都做。」

　　「幾時做？我都唔見你成日出街嘅。」

　　「哦！放學做囉。媽咪！你應該嚟睇吓我地點做，等我向你展示一下我嘅姿勢，手腳互用，威風無比㗎。」

　　阿媽登時O晒嘴，以為兒子不只性上癮，還有展示狂！

　　「仔呀仔，你太細咧！」

　　「唔細咧，我老師十二歲就開始，而且收錢㖭。我唔使錢喎。」

　　「咁你同邊個做呀？」

　　「冇定㗎，成班人一齊做。」

　　「你同過幾多女仔做呀？」　

　　「我同男仔做個喎，有中國人、美國人、非洲人、中東人……」

　　母親只想搵氧氣筒！

　　父母都著緊青春期子女的活動，往往「(目及)實」其朋友往來、社交圈子、網上動向等，有時甚至侵犯私隱，鬧到兩代「開片」，其實好多時都是虛驚一場。相學上有兩個特徵，指向比同齡青少年更早對愛情或色情興趣：

　　一、卧蠶豐滿的人早熟：卧蠶很容易與眼袋混淆，前者是緊貼下眼皮，大約4-7mm長、1cm闊，好像一條小蠶蟲橫卧睫毛之下，眼袋在下眼皮處，距離睫毛較遠，大約1-2cm，而且不緊實，並呈三角形。還有一個簡單方法：微笑時卧蠶會變大、更明顯；眼袋相反，會變小，甚至消失。卧蠶肥大的青少年早拍拖，一來因為他們天生對異性較早好奇；二來因為笑起來很cute，容易吸引異性。但多數停留在puppy love的階段，想像多於一切。

　　二、下唇特厚的人好色：普遍來說，下唇會較上唇略厚，但若異常的厚，則代表傾向享受，愛好觀能的刺激，在性方面較衝動，除非是面方而且眼神內斂，否則在性方面缺乏節制，容易闖禍。

　　若果子女有以上特徵，父母都適宜趁早灌輸性知識和正確的愛情價值觀，以防他們人細膽大，搞出隱病，或者搞出人命！