行入超級市場，成千上萬嘅貨品當中，點先可以成為客人揀進購物車嘅貨品？同樣，當你踏進職場，喺成千上萬嘅競爭者當中，點先可以突出自己，畀老細知道你嘅長處，到搵人升職時即刻諗起你？

　　打工仔嘅仕途其實同做marketing一樣，其中一個重點在於你如何營運一個品牌。做marketing就係諗橋幫公司同產品做branding；喺職場，你就要諗橋幫自己做個人branding。一啲做marketing嘅策略同理念，同樣適用於有效建立個人品牌。

「Brand Preference」

　　好多公司會用好多budget打響公司品牌，例如賣地鐵廣告、outdoor advertisement或者贊助商業活動。好多時呢種brand building嘅廣告未必可以即時推動產品銷售，因為佢嘅主要目的在於先喺客戶腦海中留一個印象、一個位置，慢慢建立同消費者嘅關係。到消費者真正有需要該類產品時，就會諗起佢或者推介畀朋友，繼而選擇購買佢哋嘅產品。

　　好多初出茅廬嘅打工仔喺職場只顧埋頭苦幹，OT到三更半夜，希望以佢哋嘅勞力換取老細終有一日賞識佢嘅機會。但對於老細嚟講，面對成條team、成間公司幾十個員工，呢種咁「被動」嘅方法好難令佢記起你。所以好多時職場新手就要唔好怕蝕底，主動啲要求參與公司上嘅唔同project，甚至唔好介意做一啲其他人認為係「下欄」嘅工作 (例如jot minutes、做meeting recap等)，因為每項工作都係表現自己嘅機會，就彷如消費者一次又一次行過燈箱廣告，不斷話畀佢知呢個品牌嘅存在同佢嘅價值。

　　如果你能夠表現出你擁有做好小事嘅基礎，就等如話畀人知你已經準備好做其他大事。雖然呢啲小事唔會即刻幫你升職加薪，但絕對可以搏得老細嘅好印象 (awareness)，為下一步贏取老細嘅偏好 (brand preference) 做準備。

「Word of Mouth」

　　如果一位女士想買面膜，當佢行入化妝品店，面對貨架上廿幾種完全唔熟悉嘅面膜時，佢未必有信心貿貿然試一隻新牌子。但如果其中一款係佢喺朋友口中聽過，甚至提過話「幾好用」，那怕只係稍為提及過幾個字，消費者對佢嘅好感已經勝過其他完全冇印象嘅面膜。

　　喺職場幫自己做branding，word of mouth同樣重要。口耳相傳喺辦公室有時仲effective過send email：一個消息、一個八卦、一個錯誤可以喺一個早上就不知不覺地傳遍整間公司。當你喺公司某一個project做出一點成績，再由第三者傳到老細耳中，呢類型正面評價 (positive word of mouth) 往往比你OT二十個晚上更有說服力。所以就算老細冇份參與嘅project或會議，你嘅一個決定、一句說話，其實老細都清清楚楚。記得，無論有冇老細在場，只要有「觀眾」，每個task都係表現你自己嘅機會。

　　更多營運個人品牌要訣，下集再續。