認識一位朋友，佢由畢業至今工作十多年，只打過一份工，出眾嘅工作能力使佢今日非常成功，令人羨慕。但現實生活中，又有幾多個打工仔可以同樣地咁成功呢，如果眼光唔好，喺同一間公司工作一直唔轉工的話，搞不好可能「咁就一世」。之後如事者做咗十多年，到時走又唔係，唔走又唔係。以下幾個要點，重新思考辭職嘅原因。

上中下層都出事

　　一個團隊好講合作性，如果同事／下屬／上司之間有溝通問題或者係「心理障礙」，就好難成大事。老細／上司係一個團隊嘅頭目，如果上司平庸，永遠口邊都掛住「我要新嘢」，但實情係「口中求變，心中求穩」，永遠接受唔到新事物，一百個決定中只得一件事唔係用上年template，試問有能力嘅同事又點會有發圍之日呢？

　　另外，如果公司有一班老謀深算嘅中層／同級同事，經常做埋啲損人不利己嘅事情，諗方法抬高自己、逼走人哋，令你工作每日步步為營，處處驚心；再加上有啲公司為咗慳錢，只會請平價、冇經驗而且無關係嘅junior同事，佢哋日日返工都好似「新同事」咁，無時無刻都處於完全失憶狀態。一間公司如果有呢個組合，真係早走早著。

升職速度慢、加薪幅度少

　　成日同職場朋友講，返工除咗要努力工作外，仲要多加留意公司其他嘅事情，例如公司嘅營運情況同利潤等等，當中最值得研究嘅係公司嘅晉升架構，意思即係「點先有得升」。香港有啲公司係行「論功行賞制」，只要你有料、有表現，升職並唔係難事，見過有啲高增長、高潛力嘅公司會年年升職加薪。相反，有好多公司依然係行「排隊制」，不論你幾叻，年資未夠2年就冇得升做senior，或者前面嗰個一日唔走，你一日都冇得做manager。再唔係有啲公司就習慣「空降」，呢種我哋叫「永遠冇得升」。更甚嘅係，就算有得升，都只加幾百蚊 / 2-3%（可能冇得升都係加2-3%……）。你再數數手指，每年只加五百，可能做4-5年先加得2千蚊。如果遇上啲經常「手緊」嘅公司，又加得少，又難升職，冇乜特別的話，做一陣好閃人。

公司營運 

　　Marketer買股票有著數，其實係一件相輔相成嘅事，因為marketing呢個崗位令我哋能夠了解公司整體營運狀況，看清公司前景。如果公司係上市公司的話，間唔中睇下公司股價消息，令你更清楚未來方向是否能夠突圍而出。另外，公司數期狀況嘅變化，亦係一個好重要嘅訊號。好多公司嘅數期都係以月計算，有啲大公司更會以年計，但「月計」定「年計」唔係重點，因為唔同行業、唔同公司都會有自己一套嘅數期，但數期長短嘅變化係就一個指標。如果公司數期突然間愈嚟愈長，就正正反映公司營運出現問題，周轉不靈從而令數期延長。而周轉不靈亦係大多公司倒閉嘅原因，如果發現公司喺數期上不停地出現亂子，可能係倒閉嘅先兆。

過份安穩

　　好多打工仔都希望入大公司做，穩定得嚟人工高福利好，之後就會抱住「做一世」嘅心態打工。但亦因為太過穏定，就會缺乏危機感，唔會再主動學習，同時亦失去向上爬嘅動力，慢慢建立咗一個好強嘅comfort zone。當有一日公司裁員，失去競爭力嘅你就難以喺社會立足，搵工就變成你一個好大嘅難題，所以有時太過安穏嘅生活亦未必一定係好事。

　　每個人辭職或者留底都有自己嘅理由，但唔好將理由變成藉口，要把握現在，先有機會擁有將來。