大部分老細都有個錯覺，覺得social marketing係零成本、好易做，所以有理冇理都搵同事試下先，「做得唔好嘥」。事旦開個facebook/ instagram 專頁，之後將公司嘅promotion material 放晒上去，就叫做「搞掂」。當然啦，每個人對「搞掂」呢兩個字嘅理解都唔同，但如果喺零budget、零人手之下，又要追到KPI、又要幫公司搵到生意，基本上係好難，極其量「做得到」，但一定唔係「做得好」。

　　喺香港搵一間廣告公司做social marketing，如果唔將投放落廣告嘅費用計算在內，單單以管理一個facebook專頁計，平嘅廣告公司一個月收一萬幾千，貴嘅上十萬都有，價錢「平與貴」直接影響「質與量」， 「量」除咗指文案嘅數量之外，亦指參與項目嘅團隊人數、report嘅多少、甚至喺有啲特別嘅情況下，連回覆fans嘅留言數量都會計算在內。但近年因為品牌公司愈來愈重視social marketing，所以某啲行業嘅公司會傾向有自己嘅social team，自己寫返文案內容同回覆留言，希望令其更為精準。而為咗要配合品牌公司嘅內部運作，所以而家一啲較有彈性嘅廣告公司，會將管理專頁嘅服務拆散分開收費，按單執藥，希望令專頁收到最大效果。

　　好多老細聽完後都會覺得，與其要洗上萬元去搵人做，倒不如搵一兩個marketing同事，每日抽半個鐘做下facebook就已經足夠。但其實要做一個盡責嘅小編，絕對唔係「一日做半個鐘」就做得到嘅事，而繁忙小編嘅工作大致分「專頁分析」、「制定策略」、「準備文案」、「回覆留言」四大部分。

　　多數小編會花好多時間去寫文案，但其實如果要做得好，最大工作量反而係前期 ／後期嘅分析工作，之後再制定策略，呢個亦係小編最值錢嘅部分（我覺得）。facebook個個都識睇，但就好少人識得睇完後搵出有用嘅insight；文案個個都能夠寫，甚至可以請槍，但點樣去分析品牌、配合公司 digital 同 marketing 嘅版圖，制定長／中／短線嘅文案策略先係重點。專頁分析可以話係最花時間嘅一環，除咗要睇自己品牌過去表現，又要睇埋direct／ indirect 競爭對人手做過嘅所有事情，不時仲要搵一啲做得好嘅品牌例子作參考，亦要經常留意行情，睇下大方向有冇變化。萬一facebook或其他social channels更改玩法或推出新功能，又要嘥好多時間去study，再諗下點apply落自己個page之上。做好晒資料收集，再分析、制定策略，再要令老細明白嘅你諗法，完成晒以上嘅前期工作，相信已經用咗小篇一半時間。

　　準備文案又係第二個地獄嘅開始，唔好以為寫一個得百零二百字嘅post好似好簡單，但如果要將老細所有嘅要求放晒入去，仲要每個post 嘅文案都能夠好有層次咁分開 lead-in、content、call for action，再配合相片令訊息簡單易明，其實唔係易事。而相片又係另一個難題，好多公司因為冇budget，所以你會見到佢哋來來去去都係用果幾張相，又或者搵啲網上免費素材，再加上自己美圖秀秀嘅功力結合而成。當你交畀老細過目時，最後因為佢突然改變主意，你搞咗幾個鐘嘅心機就會功虧一簣。最後終於寫完文案、回覆晒所有留言，就要落廣告。其實落廣告都好有技巧，所以對好多冇乜受training 嘅小篇呢講，呢一part係有少少頭痕，一來唔識準確預計budget同result，二來經常有一班不知名嘅菲律賓、泰國等等嘅非本地人like你個page，次次要同老細解釋已經想死。

　　唔同行業、唔同公司嘅小編都有自己嘅一套工作模式，可能有啲較著重品牌／產品嘅education 同awareness，所以搞好多活動。有啲側著重sales同traffic，所以落好多廣告。不論你係乜行業／公司都好，如果要搞好呢個結合不同功能嘅平台，請各位老細高台貴手，給多一點人手、加多一點budget，咁就「做得到」之餘，亦會「做得好」。