香港好多「十項全能」嘅招聘廣告要你乜都識，就算係一個 junior marketing executive，要識word、excel、ppt等，只係正常，要識photoshop同剪片係基本，但又要識SQL、HTML、CSS、多國語言、十張証書等等，已經唔係multi-tasking咁簡單。最唔明嘅係，連老細咁叻仔都唔能夠「十項全能」，點解佢哋又會覺得能夠請到一個人工比自己低嘅天才呢。慢慢呢個文化，變成常態，如果你唔能夠跟上multi-tasking嘅文化，就代表你冇競爭力。香港就係一個咁極端嘅地方。

網絡圖片

　　而另一個走相反方向嘅地方，係日本。早年日本係一個經常出現「神級師傅」嘅地方，師傅們會用一生嘅時間只做一件事，將其推向極致。尤其係喺飲食業，有好多神級嘅烹飪師傅，會用幾十年時間只學做好一道菜。當然，要將一件事推到極致係最理想嘅事，但喺香港環境之下係好難嘅事，有時太過堅持做到極致，反而會有點不切實際。再者，用一生時間「盡地一煲」，可能最後只係個吉。

　　其實選擇做一個乜都只係「做得到」、但「做唔好」嘅multi-tasking專員，還是係用一生人只做一件事「盡地一煲」，係冇對與錯。但如果每事去到太極端，不論極端嘅方向係點都好，都會連帶反效果。個人認為「70%專業、30% multi-tasking」，喺香港生存長遠比較適合。當然冇一個絕對啱／錯嘅方案，只有適唔適合自己嘅方案。而如何定義「適合」，就睇你點拿捏平衡。

　　要做到恰當嘅專業，其實唔一定需要做到全世界／香港最top嘅一群，只要做到喺自己能力範圍內，老細難以將你「即炒即走」就好足夠。而要做到恰當嘅multi-tasking，亦唔需二十件事都要樣樣皆精，因為就算老細幾貪心都好，都唔想同事樣樣都係半桶水。

　　但一定要緊記，不論係做到最專還是係最multi-tasking，如果之後係換走哂你嘅健康、快樂同時間，最後都係冇意思。你可能記得project上嘅每一個細節，但就忘記與家人嘅開心時間；你老細可能係「冇咗你唔得」，但朋友們就「冇咗你冇分別」，再專業或者再multi-tasking，都只係「打工」，而唔係「工作」。工作，意思係你控制佢，將佢成為你生命嘅一部份。而打工，就係你唔能夠控制佢，令佢成為你生命嘅全部。

　　雖然俗語話「只有你跟住個世界轉，個世界唔會跟住你轉」，但跟還跟，工作要活出自己嘅節奏同時間，做返自己，先能夠係「工作」，而唔係「打工」。