KOL喺marketing中已經變成不可或缺嘅一部份，而家近乎每一個marketing嘅宣傳campaign都一定有KOL嘅參與，尤其喺國內或部份中／高檔次嘅品牌，有KOL嘅參與可以話必定對KPI有保證。質素好嘅KOL費用十分貴，由十萬至幾十萬不等，雖然係貴，但好多品牌公司都覺得比起用明星更物有所值。更有部份KOL能夠保證 KPI，上至賣車，下至賣平價化妝品，佢哋都有信心寫包單，確保今次宣傳帶嚟幾多生意。

       雖然能夠確保「有數返」，但幾十萬做一個KOL一次性嘅campaign，唔係間間公司都願意花呢筆錢。所以近年有品牌公司／廣告公司開始轉戰KOC（Key Opinion Customer／Consumer）市場，開拓一個更新、更平、更有效嘅宣傳工具。嚴格嚟講，對比KOL，KOC唔可以話真係有opinion，而係佢哋喺朋輩間有較強嘅影響力。佢哋亦未必好似KOL係品牌嘅長期客戶或忠實fans，但KOC嘅影響力會比KOL嚟得更直接，能夠更易影響身邊人嘅消費模式。朋友有意購買同類產品時，KOC可以左右佢嘅品牌取向，就算朋友未有諗過購買產品，亦會因為KOC而受到影響。KOC能夠同時間帶來橫向同直向嘅生意。

       另一方面，就算係一啲有質素嘅KOL，佢哋嘅社交平台或真實社交圈子，都難免有「水份」，國內嘅KOL更為嚴重。但KOC喺呢方面就嚟得簡單直接，正常消費者嘅社交平台好少會有水份，就算係面對面同朋友介紹產品，亦冇必要為品牌而講大話，所以質素一定較高。

       其實KOC喺早年已經略現雛型，尤其喺dark social 嘅世界中，有段時期呢類宣傳十分普遍，更喺「媽媽」嘅WhatsApp群組中更廣泛被利用。相信大家唔難見到幾年前喺WhatsApp 瘋轉嘅discount 訊息，「我朋友係某某店嘅員工，只要俾錢時講佢嘅員工編號，買野就有八折！」，然後就會引來大量嘅share同生意。其實呢類訊息有部份係真，亦有部份係宣傳技倆，但發放呢類訊息嘅人，就正正體現KOC嘅功能同重要性。

       暫時好多公司都會當KOC係一次性嘅宣傳工具，所以近年出現多咗KOC嘅手機APP，專門為品牌公司打入KOC市場。但因為經過一個APP／中介嘅關係，質素未必有保證，極可能出現「有水份嘅KOC」，令市場變質。但如果要keep住質素，應該要當KOC係一個長線嘅投資項目，喺不同嘅宣傳項目中都要加入KOC嘅元素。佢哋嘅宣傳結構上可能同membership ／ MGM（member get member）有少少相似，消費力亦未必夠membership 強，但滲透力就略勝一籌，開拓新嘅潛在生意板塊亦更為有效。

       而家係KOC模式嘅成長初期，佢嘅用法、結構、宣傳策略等，都仲有好多可變嘅地方，可以生成出不同嘅新模式。但就算點樣變都好，最重要係我哋要學習如何掌握同預測到消費者嘅一舉一動，先可以發現更多潛在嘅可能性。