環球經濟復甦步履為艱，所以唔少人都將比特幣（Bitcoin）當避險資產入手，再加埋一班炒家，令到比特幣曾經衝破四萬蚊美金關，不過走勢就極之波動。而最近香港證監會就批出咗全港第一個虛擬資產交易嘅牌照，畀BC科技集團（00863）旗下嘅OSL虛擬資產交易平台，主打可追蹤同可以同傳統銀行體系接軌，不過入場門檻都幾高，散戶想玩相信都要有排等。

平台為專業服務為主，散戶只能間接參與

　　搵到BC科技執行董事刁家駿同《經濟不停學》傾傾，佢就話平台喺香港嘅虛擬資產交易服務仲未開始，將來主要服務對象會係專業投資者，包括擁有800萬元或以上可以用嚟投資嘅流動資產的個人投資者，企業，以及持牌既基金經理、劵商等機構投資者。

　　如果有非專業投資者想參與，目前唯一方法就係買隻包含投資本港虛擬資產嘅基金，並由基金經理操作，所以對一般散戶嚟講，參與只會係好間接。刁家駿就認為，交易平台服務面向散戶要到下一階段，前提係行業整體門檻足夠保護到佢哋。

平台亦做配售分銷，交易可追蹤

　　平台會提供比特幣、以太坊等虛擬貨幣交易，亦會幫發行商或企業提供經紀服務，包括配售，分銷證劵型代幣等，未來仲會推出更多唔同種類，以虛擬貨幣計價嘅產品。其中佢認為證劵型代幣長遠會有好大發展空間，例如幫到金融機構融資，而家都同緊潛在嘅發行人溝通，確保首批具備高水平，但唔知幾時可以面世。

　　事實上，有冇牌嘅最大分別，按刁家駿透露，平台入面所進行嘅交易可追溯性好高，幾時買、幾錢沽，執行交易嘅人係邊個，通通都可以睇到，好似我哋經劵商買股票咁。不過咁就等同失去咗虛擬資產透過區塊鏈交易嘅去中心化、買賣保密性等好處，佢就認為，以往機構投資者對買賣虛擬資產卻步，就係因為冇辦法同傳統金融體系對接，而呢一點係非常關鍵，要做到反洗錢同有合適審查，先可以做大成個虛擬資產交易市場。

平台無「孖展」，吸引力成謎

　　另外，客戶資產同公司資產係完全分開，意味平台唔可以孖展（保證金）畀客，平台收入來源會少一個。聽佢咁講法，OSL雖然飲到「標榜持牌」嘅頭啖湯，但監管似乎頗審慎，喺可追溯性提高嘅情況下，虛擬資產喺面向大眾嘅吸引力大細依然成謎。

　　若然將比特幣、以太坊等虛擬貨幣當做一般投資產品嚟Trade，除咗供求關係其實冇乜基本面可以參考，風險相對都高。虛擬資產交易喺香港嘅未來發展會係點，真係好睇監管機構嘅做法。

撰文：吳藹林