子華神曾經講過，世界上厲害嘅降頭就係「冧巴降」！對散戶嚟講，一個冧巴可能就係搵唔搵到幾餐買餸錢嘅關鍵；而對上市公司嚟講，最重要嘅梗係意頭同面子啦；如果咁不幸抽到唔好意頭嘅冧巴，就唯有講句百無禁忌。但其實，只要你畀多少少錢，公司喺上市時候都可以揀個靚冧巴！今日就同大家睇下，上市公司究竟有咩方法，可以得到佢哋想要嘅冧巴啦！

(iStock圖片)

冧巴分門別類，各個「字頭」你要知！

 (Shutterstock圖片)

　　上市冧巴其實係有分類嘅，好耐好耐之前上市公司冇咁多，編號最多都係得３個位，而家已經加到去４位數。４位數嘅冧把，分別在於第一個號碼，８字頭嘅係創業板專用、４字頭係特別嘅外滙基金同政府債券，而有部分２字頭同３字頭嘅係交易所買賣基金等等。

　　當呢啲冧巴都差唔多用晒，於是近期嘅新經濟股就要用埋9字頭喇！但其實900至9399、9500至9599、9800至9849都係有其他用途，係以美金買賣嘅基金或者反向產品。依家嘅上市公司其實係可以用94或97字頭，只係暫時未有公司揀；但99就好受歡迎，可能係貪佢諧音係久久，寓意長長久久。

　　仲有呀，上市公司若想要個靚冧巴，原來係有得「課金」㗎！點「課」法，未必有太多人知。

　
揀冧巴要抽籤，或可捐錢自選！

(iStock圖片)
　　

　　大家有時候聽啲上市公司揀上市編號，都會搵好意頭、等人容易記得咁。其實香港要上市揀號碼，同自選車牌一樣，只係自選車牌畀庫房，上市公司就要捐錢畀慈善機構啦！

　　所以港交所（00388）推出「股份代號慈善計劃」，上市公司只要捐款畀「港交所慈善基金」，就可以攞到佢哋心儀嘅代號，喺過去超過20年，已經有好多公司參與計劃。至於港交所都好識DO，上市敲鑼嗰日，通常由上市公司管理層向慈善基金遞大支票兼打卡，簡直畀足面呀。

　
冧巴朗朗上口最入心，阿里成龍頭或同風水有關？

 (Shutterstock圖片)　

　　而價錢就係咁計嘅，如果想揀號碼，主板上市嘅大概要捐300萬，創業板上市200萬，交易所買賣產品（包括基金同槓桿同反向產品）約100萬，就可以直接由「普通組」或「特別組」揀個別冧巴，毋須抽籤。

　　特別組入面會有啲8字尾、連數或者有吉祥寓意嘅諧音冧巴，有啲公司會揀佢哋嘅成立年份，同公司名有關嘅。好似京東（09618）咁，因為公司創辦日係6月18日，所以捐錢揀返個「618」號碼，等人容易記！

　　好多生意人都信風水，「九」係易經上有「大陽」之意，「八」諧音「發」，阿里（09988）上市未足一年就成為龍頭，唔通真係關風水冧巴事？！不過，投資涉及風險，堪輿嘅嘢參考下就好啦！而作為投資者，冧把靚唔靚唔緊要，最緊要股價靚！

撰文：吳藹林、李皆穎