喺股票技術分析入面，走勢以及買入賣出信號係投資者所關注，其中一款最常用就係唔同顏色嘅「移動平均線」，係用嚟統計過往指定日數收市價嘅走勢，投資者可以跟據自己想長揸定短炒，睇唔同日數或分鐘嘅線圖。有時平均線嘅組合，仲可以用嚟推推斷後市會升定跌添。

（shutterstock圖片）

移動平均線有兩種，搵啱種類有「錢」途

　　移動平均線有兩種，一種叫SMA（簡單移動平均線）同EMA（平滑移動平均線），兩種線都係利用過往指定時間嘅收市價嚟得出新嘅數值，佢哋分別在於計算方法有唔同。計EMA，愈新嘅數據比重就會愈大，而舊有數據隨時間推移比重會減少，以一條10天線為例，假設第一日同第八日嘅收市價都係5蚊，但對於計算呢條線嘅新數值嘅時侯，第八日嘅5蚊係會重要過第一日嘅5蚊，理念係在於最近出現嘅資料應該比較重要。

　　至於SMA，第一日嘅5蚊同第八日嘅5蚊對條線嘅比重都係一樣，理念係認為每日嘅股價都有重要性，所以將每日嘅收市價直接除開指定日數，但只要其中一日嘅股價升／跌幅較大，就會好影響成條線未來嘅數值。所以喺極之波動或者冇明顯方向嘅市況中，可以揀長啲日數嘅線嚟做參考。

玩家常用SMA，短炒睇分鐘圖！

　　依家大部份投資者會用SMA，以一條20天嘅SMA為例，現價低（高）過20天線，代表如果喺現價買入，你會買得平（貴）過過去20個交易日（約一個月）買入嘅投資者，呢套諗法識用於所有移動平均線；想長揸嘅投資者可以揀啲日數較長嘅線做參考，例如100天線（約五至六個月）同250天線（約一年），短炒嘅可以睇分鐘線、10天線（兩個星期）、20天線同50天線（約兩個半月）。

　　股佬成日會拎佢哋嚟睇支持位同阻力位，因為可以好容易咁按往績嚟參考，當價格升破或跌穿一條平均線之後嘅走勢，都可以講係心理關口。不過，平均線嘅數據係有滯後，反應唔到即市表現，但就可以用作預測往後走勢大約會點走，但需要留意係，呢個預測係假設無任何影響股價消息嘅情況下，假如市場有重磅消息推出而影響股份，MA線甚至陰陽燭都會短線失效啦!

美國國防部宣布將小米列入同中國軍方有關聯嘅制裁名單，小米（01810）股價喺今年1月15日裂口下跌逾一成，二十天線失去支撐作用。（資料圖片）

移動線要配合其他技術分析，先可提高準繩度

　　MA線可以有兩種作用：買入／賣出位，同埋股市走勢。不過投資者唔可以單憑MA線就決定買入賣出，特別係當所有天數嘅線揦埋一著，咁就會好難批判大市走勢啦！

　　所以，想更好咁運用MA線，常見方法係配合MACD（指數平滑移動平均線）同成交量，例如一隻股份10天線向上穿越20天線，可以係第一個買入信號，亦都係有機會莊家「呃貨」信號；但如果MACD同時都出現「買入交叉」以及有大成交量配合，咁就可以確信隻股份有機會由跌轉升啦！

　　其實，有時線與線嘅形態組合會有含意，可以幫到我哋分辨牛市定熊市，當然都係較偏向技術分析，下集再講。

撰文：吳藹林