我哋成日留意股市，聽得最多就係乜乜乜指數收報幾多幾多，但係有無人知道，呢啲指數其實係點嚟，佢哋又點樣操作？唔講唔知，其實背後有好多被動基金都要依靠呢啲指數先做到嘢，所以要清楚指數有乜隱藏含意係相當緊要！

恒生指數意義重大，代表香港經濟發展

　　大家成日聽到嘅「恒生指數」，其實係1964年由恒生銀行研究部負責人關士光所創製；而係恒指出現之前，香港都曾經用過一個叫「伊利斯股票指數」，仲要比恒指早出現20年!！不過礙於當時局勢混亂，加上經濟環境差以及資訊唔流通，創立呢個指數嘅伊利斯於1950年逝世之後，就無再用過啦。

　　而恒生指數本來只係畀恒生銀行內部使用，呢個指數以1964年7月31日為基數，基數點為100點，同時選出33間上市公司股票為成分股；後來去到1969年11月24日正式向外界發布，推出之後一直都成為外界衡量香港股市嘅重要指標。唔少人認為，恒指更代表緊香港經濟發展，以及同樓市有間接關係，甚至對環球股市都有影響！

恒生公司每季做檢討，每隻股份佔比不一

（Shutterstock圖片)

　　咁恒生指數又點樣制定呢？其實係由恒生指數公司，將代表到香港股市嘅股份納入指數之內，每季都會進行檢討，睇睇指數成分股會唔會交投太少而需要踢走，或者會唔會有啲股份交投旺盛，有代表性意味而需要被納入。而呢個「執位」動作成為每季季尾投資者關注嘅大事，因為大家都估緊恒指會納入或者踢出邊隻股份，所以會預先買入或沽出啦！

　　目前恒生指數係由58隻成分股組成，不過股份市值及交投就有大有細，所以唔會每隻股份影響力一樣，所以股份入面會劃分「佔比」，例如友邦（01299）、騰訊（00700）、美團（03690）成交較大，比較能夠代表到大市，所以佔恒指比重都會較高，所以我哋會稱呢類股份叫做「重磅股」；相對地，部分本地地產股、食品股，交投未有咁勁，相對地只佔恒指比重約0.5％左右。所以同樣大家都升10%，但意味卻有不同！

指數另一功用：被動基金追蹤

　　指數發展到今日，已經唔同國家、唔同行業、唔同投資策略，都會有佢屬於自己嘅指數，而指數另一個功用就係可以畀被動基金追蹤。例如大家手上嘅強積金，其實都會有得選擇港股基金，呢類基金會跟住恒生指數58隻成分股納入或者踢出，而進行沽貨或者買貨動作，所以每一次恒指季檢前後大市都略為波動。

　　除咗恒指之外，仲有其他指數，例如MSCI、富時指數等，佢哋都係一啲投資大行或者指數公司自行推出嘅指數，好似MSCI就係由摩根史坦利推出，指數類型包括不同國家、產業、地區，被認為係大行買貨賣貨嘅重要指標，例如2018年A股入摩就掀起外資炒作潮。而一般投資者更需要向MSCI付費訂閱，先會知道指數內容及升跌，所以話指數真係大不同，學識點用好緊要！

撰文：李皆穎