「辭職大晒咩？」同事W谷到田雞一樣，小弟多番旁敲側擊，才套到幾隻字。最近本港就業市場大致好景，同事走完一個又一個。對於職場上的種種人來人往，我看得很化，有人就職自然有人辭職，正常生態自然流失。不過，特別提醒各位去意已決的打工仔，好來好去，他朝君體也相同。

　　「點解你會辭職？」這個見工必問問題，也許比「食咗飯未？」或「得閒飲茶！」更多餘——如果追求「答案」的話。我相信，答案不重要，最重要的是求職者的人品及修養。

　　不幸的是，太多事情未到最後均屬「開心得太早」，看人看事亦然。即使同事來見工時吹到天花亂墜，如何如何唔請唔得；工作時怎樣落力盡責、刻苦耐勞……見真章的，始終還是劈炮的時候。

　　辭職，總有一池講不出聲的鬱結苦水。馬雲說得到位，不是錢不夠，就是心委屈了。打工仔在遞信一刻大概都有種大快人心、吐氣揚眉的痛快，然而，要爽就爽在心底裏，切忌以個人品格及同事的福祉「較飛」。

　　「咩事？」我明知故問——其實早已略有所聞，皆因某劈炮同事辭職辭到煩到人。「佢係咁請假，尤其是有會開、有功課交嗰啲日子。出現嗰時就搲手指。」

　　在職場浮游多年，有品無品的小弟都見過一些，特別「歌頌」以下5種經典劈炮人辦，感激他們「無私奉獻」成為最優秀的反面教材︰

1、喪彈老細

　　人都要走了，何必死扛情緒包袱不放？無論前老細再為富不仁，都已成過去，難道要將「孽緣」延續到地老天荒嗎？

2、關人隱士

　　恃著捱多三五七日便「脫苦海」，擺出一副「關人隱士」的嘴臉，十問九唔應……這樣的工作態度，不論何時何地都是「苦海」吧！

3、猖狂「射波」怪

　　如果真是返多一日都太多，就爽快攞假走，甚至更型一點賠錢閃。請勿無品請假，加重無辜同事的負擔。

4、小器小學雞

　　有人故意不派散水餅給某些看不順眼的同事。其實，人家不會因為吃少件散水餅而肉赤，反而當事人就輸了氣度。

5、二五仔

　　有打工仔跳槽過檔後出賣前僱主的商業秘密，以暴易暴。這大概只會換來更悲慘的收場。

　　「咁啦，我地而家安排下啲分工。」抗衡無品人事最強大的力量，不是「清算」，而是「唔該借過」。

　　原文刊載於ctgoodjobs.hk