「我想乜乜乜」、「我諗咁咁咁」是不少求職者見工面試時，最易「出事」的句式。基於「笑你驚你嬲」的原則，HR未必會當面駁斥，不過就透露︰「有時真係求職者諗多左。」

　　人之所以會「諗多左」，原因有二，不是思想太複雜，就是頭腦太簡單。嘢不是不可以諗，唯切忌諗太多。求職者搵工面試4大「諗多左」包括︰

諗多左1︰想或諗住試下

　　天真豬想法/ 答法：「我有嘅係青春，梗係咩都想試下。」

　　HR反眼原因︰「唔知求職者你係想嚟試下見工，定想入嚟試下做，總之我地無人想試下請你。」

　　諗真啲：見工面試，求職者回應HR問題時務必堅定清晰，不要答「想」甚麼甚麼，而是說「會」怎樣怎樣，「要」如何如何。

　　況且，搵工一味「盲中中，四圍衝」，只會浪費青春。建議求職鎖定明確的事業目標，不妨從自己的喜好和專長出發，收窄範圍後再深入了解該工種及職位的要求，務求一撃即中。

諗多左2︰想學下嘢

　　天真豬想法/ 答法：「人地啱啱畢業真係咩都唔識，至多蝕底啲畀你教下我。」

　　HR反眼原因︰「學嘢？免學費兼要出糧畀你？呢樣我又真係想學。」

　　諗真啲：公司/ HR請人，自然因為「有嘢做」，並不是「有嘢教」。求職者面試重點應放在「我可以為公司貢獻甚麼」，而不是「公司要教曉我甚麼」。

諗多左3︰想咩都唔理

　　天真豬想法/ 答法：「計我話，搵工咩都唔使理，只要份CV執正啲，面試時條眉chok啲，要見得成份工有幾難丫！」

　　HR反眼原因︰「CV只係最基本嘅參考。求職者嘅facebook、LinkedIn、面試時真實反應先見真章。」

　　諗真啲：網絡世界並沒有「私隱」這回事。尤其搵工面試期間，強烈建議求職者執靚社交平台的公開形象，一切涉及色情、不雅等內容都要過濾，連朋友間的Like及Share都要格外留神。

諗多左4︰想扮有料

　　天真豬想法/ 答法：「之前啲Projects我做幾多、做過啲咩鬼知咩，識吹一定吹自己in-charge啦！」

　　HR反眼原因︰「假的真不了！你即管吹，你愈吹我愈易睇出破綻。」

　　諗真啲：無論做人還是搵工，還是真誠老實好。求職者與其「走精面」作大老吹，倒不如切切實實地拿出真本事來，再舉證力撐；若遇上對自己不利的追問，不妨直認有所不足，有自知之明兼強調會積極改進，一次比一次做得更好，誠意打動。