「捱成半年，重係個助理仔。」初出茅廬同事R說來毫不臉紅。小弟疑問，才半年，可以怎樣？我一臉的問號，換來他理直氣壯的一句︰「半年好長啦！」噢，原來搭錯線。

　　有報道指，近年全球職銜發水，本港亦然。銀行、保險及銷售等客戶服務性行業尤甚；大學畢業生一入行便當經理的情況普遍。職銜，堪稱「低消費留人神器」，甚至無本生利。打工仔有得威，老細何樂而不為……卻累人累己。

　　「其實都係半年啫，計返只不過1個Sem咁上下時間，Paper都未交就想升職？」我說得相當溫和。怎料，R卻搶先激動起來。

　　「德少，說話唔係咁講，我啲同學一畢業就做經理……大家出嚟Gathering，我扮無帶咭片咋，都唔敢派畀人。」他不打算給我空間作回應，繼續︰「我喺度都做咗半年，公司嘅要求我全部達到，我唔明點解重未有得升。」3句，3個「我」。經典「我」型人格，未學行先學走，固然得人驚；更得人驚的是，他真的認為一畢業就做經理好理所當然；而最得人驚的是，派咭片的目的是要來威威。

　　難怪，古靈精怪的職銜推陳出新，甚麼「Senior Manager Assistant」、「Senior Associate Director」、「General Manager – Marketing Department」之類，相信也指日可待。高級助理，真是多謝晒，是比助理更助理的意思嗎？

　　「你知唔知經理要做咩？」我問。

　　「手指指囉，點呢個點嗰個，自己唔使落手做嘅。」R一臉稚氣。

　　「好呀，咁而家我地角色調換，你坐我個位，我係你助理……」我話還未說完，R笑得更開懷可愛。我加多兩錢肉緊︰「咁我而家應該做咩呀，老細。」

　　R當場O嘴。

　　「係囉，啲嘢你自己都無落手落腳做過，畀10萬個人你指揮，都係無用。」我苦口婆心。當然不是老氣橫秋說甚麼「20年後點放心將公司交畀你」，正因為恨不得讓你快啲做埋我啲嘢，才真心希望你早日上手。

　　坦白說，「出年升你」是10大辦公室內最不可信的對話之一，我從來不相信，因此亦從不口出狂言。「呢半年，你學到幾多得幾多。半年後，如果你指揮得頭頭是道，我地再傾。」