搵工面試，求職者擺少少烏龍是可以預期的。小小烏龍，未嘗不是見工面試的小點綴，有助加深HR的印象；然而，若搞出個大頭佛，求職者真係搵窿瓹都唔掂。今期特意徵集HR「最不能接受老尷事件」8大，各位求職者睇路喇！ 

【最老尷對答】

1/ 「我對上份工差少少就升職架喇！」

　　搵窿瓹罷啦：「差少少」？即係未夠班啦！若閣下真心想成為Mr. 差不多的話，請跟周董一起回到過去。

著地答法︰面試時，與其不斷狂Loop「差唔多」、「就嚟」之類「講咗等如無講」的廢話，倒不如慳番啲Airtime，爭取時間重點介紹自己的真材實料。

2/ 「因為我Daddy係CEO；而媽咪係CFO，所以呢份工我絕對勝任有餘！」

　　搵窿瓹罷啦：這毫無邏輯可言的「因果關係」，的確係個「勵志」故事。

著地答法︰都說，成功靠「父幹」、「母幹」實在太無志氣！求職搵工還是靠自己吧，自求多福，就不相信世上有懷才不遇這回事。

3/ 「中學時代，我做過學界亞皆老街與太子道西交界康樂棋學會會長兼福建炒米同鄉會擲豆袋委員會榮譽主席……」

　　搵窿瓹罷啦：這些對白只會出現在大台番梘劇。這樣吧，見工見得攰，煮個麵你食好無？ 

著地答法︰除非閣下是中學生或21歲以下，否則「那些年」的事不提也羆。難道閣下的人生中，再沒有比康樂棋和擲豆袋更具競爭力的事可以分享嗎？ 

4/ （當HR問︰「請問你喺搵工呢段真空期做過啲咩呢？」）「無做過咩喎！日日係屋企攤屍。」

　　搵窿瓹罷啦：（求職者咁都答得出……編輯仔都無話可說喇！）

著地答法︰休息笨不代表hea，真空期間一樣可以過得好充實，睇書、進修、了解行情、做運動等，都是自我增值的方式。

【最老尷場面】

　　5/ 求職女誤將名廚Jamie Oliver的食譜當作CV，發送至心儀公司應徵

　　6/ 躁底男在地鐵上鬧爆途人「阻街」，後來發現被鬧者正是他的面試官

　　7/ 有求職者被發現穿鴛鴦鞋或襪去見工；甚至有人「火車未到站」

　　8/ 有90後畢業生於小組討論環節中不停轉凳，結果連人帶椅四腳朝天