打工仔撈得愈耐，奴性難免會愈重。只係想放幾日Annual抖抖，都會出現淆底、Sam Hui（心虛）等異常徵狀。要開口同老細攞假？「不如一槍打死我」。呢次唔打算廢噏咩 「休息是為了走更遠的路blablabla…」，想說的就只有一句 ：

　　「勞力是無止境呀，施主！」仲等？睇埋下面5大理由就好入紙攞假喇喂~

1/ 「我只想身體健康」

　　根據港大去年調查發現，約25%受訪打工仔有精神困擾。累積壓力有機會帶來高血壓、心臟病等後患；而家唔放假，遲早攞病假。打份工啫，犯不著搵命搏。

　　放鬆啲啦！放假鬆一鬆，絕對有助身心健康。打工仔一星期踩足6、7日，鐵人也生鏽，Chur足數個星期更會容易増加抑鬱風險。

2/ 「最心痛是愛得太遲」

　　有機構調查反映，近4成中產家長表示放工後與子女相處時間不足2小時，與家人極少溝通。

　　放鬆啲啦！打工仔每日返工閒閒地8粒鐘，見同事仲多過屋企人。藉著放假與家人相聚，過番些少Quality time，也是舒緩壓力的一大良方。

3/ 「離開是為了回來」

　　海量研究顯示，工時長不等於「腦筋急轉彎」，反而減低創意和專注力，拖跨工作效率。

　　放鬆啲啦！放假讓自己Refresh一下，能夠為工作帶來新鮮感。叉叉電再醒目開工，對老細來說條數絕對化算。

4/ 「如戴著面具去掩飾倦容」

　　沒有紅日的日子，每星期一至五都要Chur到「謝曬皮」咁款；不管Chok聲還是Chok樣，打工仔Day Day都要帶著面具做人。

　　放鬆啲啦！放假不論宅在家中hea過抑或外遊，遠離辦公室政治，只需對自己負責。搵一兩日抖抖氣，皺紋都少幾條。

5/ 「人一世物一世，最重要開心得徹底」

　　最後當然使出必殺技。的確，劈炮同事可以突然大晒。之前日以繼夜、夜以繼日儲埋成個月大假，大條道理等你攞。人走茶涼，而家唔放等幾時？

　　咪走住：假除咗識得攞，仲要識得放。基於放假應該同工作斬纜，手上工作總要有人執手尾。打工仔由「生活」回復「生存」狀態唔想變犯眾憎的話，放完大假記得請同事們「食餐晏仔」，外遊的話手信酒水少不了。