正所謂「新嚟新豬肉」，任何年代嘅新人（包括Intern仔）初入職場，總會被指派負責瑣碎工作，碎紙、影印、接電話，甚至被前輩恰。面對呢啲情況，大部分人都會有感自己不受重視，甚至覺得學唔到嘢、前景堪虞。

　　的確，新人階段未必接觸到公司業務嘅核心，但正如打RPG一樣，主角初登場就算係Lv 1都有專屬武器，新人身分其實係一種「特權」，有啲嘢係新人先做得，一旦做得好、做得啱，就能為職涯打好基礎，準備隨時上位！

特權1：問題天天都多

　　你係新人，老細、同事就預咗你乜都唔識，所以可以盡量發問，唔使覺得唔好意思。唔少老細寧願你咩都問，好過你咩都唔問但最後做錯哂。另外，老細見你肯學肯做，自然對你好感大增，覺得呢個後生仔女係可造之才。

特權2：犯小錯

　　新人時期犯啲小錯無傷大雅，甚至有助職場發展。新人全無實戰經驗，犯錯情有可原，只要你表現出對工作嘅熱誠，勇於認錯並承諾改正，通常都會獲得原諒。而且，人之患在好為人師，好多老屎忽之所以恰新人，無非係驚你威脅佢地位，佢要擺姿態，顯示自己嘅重要性。

　　你犯錯等於示弱，佢就會覺得你無能力威脅到佢，會比較容易接受你；你犯錯後再虛心求教，佢會以為自己好有料好識教人而飄飄然，知無不言言無不盡，你可能可以從中得益。

特權3：碰釘兼行冤枉路

　　對業務唔熟悉嘅新人，經常付出10分努力，最後只得到5分成果。呢啲看似徒勞無功嘅努力，其實係成功嘅過程同養份。世界上無「無用」嘅經驗，你永遠唔知你今日呢份做得好辛苦但被個客ban咗嘅Proposal，會唔會成為下一個Project嘅參考資料；又或者你被迫出席一個又悶又走唔到嘅商業活動，會唔會識到一個Potential大客。

特權4：天馬行空

　　資深員工最大問題係惰性，因為太熟悉業務而不知不覺墨守成規，培養出一套自己做嘢嘅方式、對行業嘅既定概念，難以改變，令經驗反成負累。新人勝在對行業一無所知，自然可塑性高、想像力強，可以提出好多天馬行空嘅創新建議，拓展更多發展空間。