香港出名工時長，每日返工見同事嘅時間，比見伴侶、家人仲要多，所以如果要喺一個唔愉快的環境工作，同唔咬弦嘅人日對夜對，真係認真攞命！有網民在討論區開帖投選辭職原因，選項包括：跳槽、其他公司高薪挖角、做得唔開心、同老闆和同事不和、轉行、進修等。結果大部分人認為「做得唔開心」就應辭職，其次是「同老闆和同事不和」。

上司偏心 管理不善成致命傷

　　點先算做得唔開心？有網民認為「份工壓力大」、「同事難配合」都會令自己在工作中不快樂。亦有網民大呻：「做得再好都無人讚，日日拼命為公司，結果畀人喺背後放暗箭。」

　　相比與同事的相處，上司管理不善卻令人最難接受：「同事喜歡玩小動作可以無視，但上司處事不公、不合理，會令員工士氣低落！」更指：「而且上司又偏心，只係喜歡擦鞋兼埋堆嘅同事，反而實幹嘅同事人工最低，做錯少少仲要被人用粗口鬧，好委屈。」有網民亦身同感受：「老闆乜都唔識，靠員工看舖，跑唔夠數只係識鬧，努力又睇唔到！」

　　不過，綜合各位網民的意見，其實打工仔走到辭職一步，往往原因不只一個。有網民認為：「辭職與公司待遇、老闆的對待、與同事相處等有關，當你做錯事，老闆只係鬧而唔會提點時，令你完全無進步。到有一日發現再留喺公司已經無意思，就會萌生辭職念頭。」

　　人一輩子工作時間以數十年計，在工作上得到滿足感的確十分重要。面對行業競爭，老闆如何留才亦是一門艱深的學問。

source:CTgoodjobs