記得童年時期，每天一早跟媽媽到酒樓飲早茶，一般都會叫幾味指定食品，皮蛋瘦肉粥或鮮蝦銀針粉。但可惜現今的酒樓，都好少會推出這味經典食品。

　　在香港，買材料非常方便，要煮銀針粉，可以到麵舖，買已做好的銀針粉回來，加埋配料就可以即炒。

　　韋太深明移居在海外的朋友，想食真係難上加難，唯有自己去搓麵糰，都可以一嘗心願。所以，今期韋太會教大家親自製作銀針粉，加埋簡單的配料就可以隨時有得食啦 ! 韋太連叉燒都係自家製作的，海外朋友不用擔心。

準備及烹煮時間 :　1 小時

材料:

銀針粉材料 (300克份量) ﹕

　　A) 澄麵  125克  +  木薯粉 (泰國生粉) 50克  

　　B) 清水  170 毫升

　　C) 菜油  1 茶匙 (後加)

七彩材料:

　　乾蔥茸 2茶匙、叉燒絲 100克、火腿片 2片、三色椒 每款1/4角、雞蛋 1個(加入 1/5 茶匙粟粉拂勻) 

調味料:

　　幼鹽 1/4茶匙、雞粉 1茶匙、生抽 1湯匙

材料準備:　

　　1. 將三色椒、火腿片及叉燒切絲，乾蔥頭切成茸。

　　2. 燒熱鑊，落少許油，用廚紙抹勻，將蛋漿加入將鑊擋勻，將蛋漿煎成蛋片，然後捲起及切絲。

銀針粉製作過程﹕

　　1. 將澄麵及生粉混合過篩，放入大碗內。

　　2  將清水煲至大滾，然後快速沖入粉內拌勻成粉糰，蓋上碟焗5分鐘。

　　3. 粉糰待涼一會後，加入1茶匙菜油拌勻，然後用手搓揉成粉糰。

　　4. 將粉糰分成4份，每份再切成小粒粉糰，每粒粉糰用手掌搓成頭尾成針狀的生粉糰，放在已掃油的碟內，全部粉面掃上油，放入鑊內大火蒸約 8分鐘即熟。

　　5. 燒熱鑊，落油2湯匙，將乾蔥茸爆香，然後加入三色椒絲、火腿絲及叉燒絲炒勻，最後加入銀針粉及調味料炒勻即成。

　　6. 上碟時再加上蛋絲及灑上芝麻更加香口美味。

韋太小貼士:

　　自製銀針粉要做到蒸出來會透明，兩種粉混合時一定要拌勻。