還有三星期就係母親節，韋太又要為大家準備一些應節食譜。平日可能係媽咪每星期入來支持。但今期開始要加埋囝囝囡囡一齊來學，到了母親節當天，大家唔一定要出街食飯慶祝媽咪先開心，囝囡合力煮餐飯才更有意思 !

材料:

　　節瓜 2 個、半肥瘦豬肉 (攪碎)   120克、燕麥片 2湯匙、蝦米 半湯匙  (刴碎)

調味料 :

　　清水  3湯匙、生抽 半湯匙、雞粉 1/2 茶匙、砂糖  1/4 茶匙、粟粉  1/2 茶匙、菜油   1茶匙 

烚節瓜水調味  :  雞粉  2茶匙

蒸瓜調味 :  雞粉 1茶匙、清水  2湯匙

粟粉水 : 粟粉 1/2茶匙 (1湯匙)

芡汁： 雞湯 (蒸瓜倒出的湯汁)  加入 粟粉水拌勻

做法 :

　　1.      節瓜去皮，清洗乾淨，切成1吋圓形厚片，用匙將瓜釀去掉。

　　2.      將調味料順序加入豬肉內攪至起膠及有黏性，加入燕麥片及蝦米拌勻，放入雪櫃冷藏15分鐘。

　　3.      用小鍋將清水煲滾，加入雞粉，然後將節瓜加入煮約5分鐘，煮好瀝水放涼，備用。

　　4.      節瓜抹上少許粟粉，釀入適量的豬肉餡料，放在蒸碟上，將蒸瓜調味加入，放入蒸鑊內大火蒸10分鐘。蒸好後，將雞湯倒出。

　　5.      將芡汁煮至濃稠，然後淋在節瓜上即成。