今屆立法會選舉，到呢一刻為止，焦點都係落晒喺一眾港獨自決派身上，特別係報名新東嘅梁天琦。一如所料，單「天」保唔到至尊，但估唔到嘅係政府殺一啲又唔殺一啲，依家面對嘅情況就係，梁天琦透過今次事件將會進一步提高知名度，並會落力為其他有類近理念嘅同路人站台，整體而言對泛民選情有最大影響。

　　今次想講一講超級區議會選情，因為係全香港選民嘅事。今屆係第二屆有超級區議會選舉。上一屆泛民出三奪三，建制派就漏低咗劉江華陪小鳳姐唱Ｋ，入唔到立法會。到今屆，建制派繼續出三隊人馬，民建聯主席李慧琼名單領軍，今年新東補選積咗啲人氣嘅周浩鼎名單做第二條隊，仲有老「黃忠」工聯會王國興名單上陣。非建制派就玩大堆頭，競逐連任嘅白鴿涂謹申之外，仲有梁耀忠、鄺俊宇、陳琬琛、關永業名單同何啟明。

　　一個公開嘅秘密，就係建制派一路都係一「黨」獨大，呢個黨並唔係民建聯，而係國家共產黨。一「黨」獨大，有利於協調旗下各大小建制政團嘅利益分配，而各建制政團，面對住阿爺嘅柯打，自不然係做乖乖孫，在選舉策略上無不馬首是瞻，阿爺叫你選你唔敢唔選，阿爺唔畀你坐正，你跪玻璃都無用，雖然講唔上係將士用命，但起碼由有勢力人士帶頭指揮，以阿爺嘅整體利益為依歸，建制派就算輸人，都唔會輸陣。

　　但反觀一直以來得到六成直選選票嘅泛民，呈現出嘅只係一副散兵游勇格局。上屆超級區議會都尚且可以協調到得三條隊出選，對建制派（唔計號稱獨立嘅白姐姐）三打三成功獲得三席。

　　但泛民吸收一次成功經驗之後，今屆反而各懷鬼胎，互不相讓，數夠票入到閘嘅都話去馬，最慘係成個比例代表制並唔係人多好辦事，面對住建制派有一個大將軍把持戰局，反而多隊出選互相扯薄票源的話，保返上屆三席將非常困難。

　　之前某一位建制派爆響口，話佢地在立法會選舉日都有做民調去評估形勢，事後搞出唔少風波。珍盈唔知建制派真實運作情況，但我一個伯爺係某社區嘅「勢力人士」，上屆選舉去到中後段，的而且確係有人在幕後大力催票，話阿邊個回天乏力，要我伯爺集中火力搵人投畀另一位候選人，結果真係臨尾獲催票嘅候選人險勝。呢一種策動能力，喺現有選舉遊戲之下，泛民選多十世都做唔到，所以珍盈敢肯定，今屆超級區議會，小鳳姐再次出場高歌「喜氣洋洋」嘅機會將會微乎其微。《莊珍盈》

＊排名參選超級區議會名單有：陳琬琛（公民黨）、李慧琼（民建聯）、周浩鼎（民建聯）、梁耀忠（街坊工友服務處)、涂謹申(民主黨)、鄺俊宇(民主黨)、何啟明(香港民主民生協進會)、王國興(工聯會)、關永業(新民主同盟)