侵侵（特朗普）出名口快出手辣，禮拜二（26日）佢喺Twitter發文之後，發現自己個Post出現個嘆號，提醒網民要「Fact Check」佢所講嘅嘢。嬲到侵侵頭頂冒煙，作為一國之首，梗係要做下嘢！

（AFP圖片）

　　噚晚（28日）有指侵侵簽署一道行政命令，主要針對社交媒體，據指內容係避免網民因為發言而負上刑責，又計劃建立舉報機制，鼓勵網民「篤灰」社交媒體出現限制言論自由地方，嚇到隔晚Twitter跌4.5％，Fb跌1.6％！

侵侵做事有效率，嚇到社交媒體股插水！（AFP圖片）

　　侵侵突然大鬥Twitter，被眾議院議長佩洛西一語道破：「這是典型的總統特朗普，所做一切都是為了分散對目前抗疫失敗的注意力。」確實「選戰臨近了，疫情卻未了」，參選人之間嘅口水戰自然增多。話說美國民主黨總統參選人拜登出席美國陣亡將士紀念日活動，期間做足保護，帶晒黑色口罩同黑超，仲有套黑西裝，離好遠好遠睇仲以為邊位韓星Oppa出巡添。

原來拜登幾有星味，呢個「Oppa」你又Buy唔Buy？（AFP圖片）

　　呢位「Oppa」當日就被傳媒大肆報道，因為對上一次拜登出巡，已經講緊係３月之前。同一時間，侵侵正出席另一個美國陣亡將士紀念日活動，不過佢就選擇無戴口罩。一個戴，一個無戴，對比鮮明。

　　Fox新聞主播布里特喺Twitter出文譏諷拜登，笑佢個口罩怪形怪相咁，之後連侵侵都Forward呢個Post。

　　點知因為呢下取笑，就畀位拜登搵位入。拜登接受CNN訪問時候反擊，話侵侵營造一種「反口罩」文化，佢呢種大男人思想係會害死好多人，繼而再話佢以人命為代價，呢種立場加速國民因病而死亡。對於侵侵唔戴口罩，拜登認為：「佢（特朗普）係一個不折不扣嘅笨蛋。」

　　相信呢啲「花生」喺大選前將會愈剝愈多。以侵侵嘅狂人性格，我比較有興趣想知下一次佢會搵咩攻擊拜登呢？

　　冤冤相報何時了？大選完了就會了！