話說前日（10日）軟銀就公布截至9月尾嘅財季業績，市場焦點放落衍生投資個一欄，因為見到虧損高達1317億日圓（約13億美元），究竟發生咩事呢？

（iStock圖片）

軟銀投資科技股出事？玩Option惹出禍

（iStock圖片）

　　睇返財報資料，軟銀集團持有上市公司嘅Long call option（買入看漲期權）公允價值為46.94億美元；上市公司嘅Short call option（賣出看漲期權）公允價值為-12.61億美元；重有就係Short stock index futures contract（看空股指期貨)公允價值達-6.96億美元。所以夾夾埋埋，軟銀係「上市公司股票和其他金融工具」錄得13億銀虧損。

　　無獨有偶，軟銀最近亦都將四名高層從董事會中除名，包括願景基金總裁Rajeev Misra，軟銀營運總監Marcelo Claure，軟銀首席戰略官Katsunori Sago，以及沙特公共投資基金的Yasiy D. Al Rumayyan，有指除名係外界呼籲下要擁有更多外部董事，不過是真是假就只有佢地先知啦！

遠景基金有錢賺仍夠Cover，孫正義指Option虧損濕濕碎

（iStock圖片）　　

　　對於呢13億虧損，主席孫正義就係會議上財報後分析師會議上表示：

　　「當你講到衍生產品好似好大風險咁，但其實只係佔我地整體所持資產總價值1％，就算真係輸，都係佔軟銀總股本1至2%」。

　　咁對比起其他投資，呢一Part又真係好小數，因為軟銀今年第二季淨利潤都有61億美元，而可以轉虧為盈，係「願景基金」搵到錢，其中基金二期有一個叫「貝殼找房」項目，2019年11月投資13.5億美元，到佢2020年8月上市，軟銀手持呢批股票升值64億美元，回報率高達375%。

　　風險投資呢家嘢，真係高風險，又高回報，抵你牙擦！

神秘大戶將3700億阿里ADR轉倉至香港，市場預計軟銀預備出貨

（iStock圖片）

　　孫正義投資風格係「鳳凰無寶不落」，當年2000萬美元投資落阿里（09988），今日阿里市值已經高過軟銀。然而最近有人發現，有一個神祕大戶將接12.6億股，市值約3700億港紙嘅阿里ADR（美國存託憑證）轉倉到香港；而且軟銀最近亦公布，公司過去半年以阿里股票預付式遠期合約套現1300億港紙。

　　市場估計，呢批大金額ADR轉倉，唔排除係軟銀計劃係香港進行沽貨離場，從阿里今年財報顯示，目前軟銀持有阿里股份達53.9億股，佔總股本24.9%，呢批股份以暫時價位計算，市值高達13798.57億港紙，所以市場估計軟銀趁好價沽貨亦好合理！

　　係風險投資嘅世代，財團都習慣對有潛力嘅公司，係未上市前就進行投資，上市之後就獲利沽貨，回報率高達十倍甚至百倍，孫正義會唔會係下一個「股神」呢？

撰文：李皆穎