有「美國賭王」之稱、金沙集團董事長阿德爾森（Sheldon Gary Adelson）係本周一（１１日）晚因為治療非霍奇金淋巴瘤，引起併發症去世。正所謂「每一個賭王都會有傳奇一生」，阿德爾森都唔例外，我哋一齊睇睇佢從賣報童到350億美元身家賭業大亨嘅心路歷程啦！

 （Shutterstock圖片）

200美元起家賣報紙

（Shutterstock圖片） 

　　阿德爾森係波士頓一個傳統猶太家庭長大，不過佢就唔係含住金鑰匙出世，佢經常自嘲自己「細個窮到連衣衫襤褸都稱唔上」，屋企六個人就只得一張床，所以三個要瞓地板。正正因為窮到怕，加上佢猶太人嘅「識搵錢」基因，所以當年12歲嘅阿德爾森搵到一條屬於自己財路。

　　由於二戰時期新聞需求加劇，報紙日日都搶到唔停手，阿德爾森睇到需求，就打算搵阿叔借200蚊美金（相當而家約3000蚊美金），買入《波士頓環球報》出售報紙經營許可權。阿叔一開始邊到會肯，所以佢日日搵爛仔打交，打到一身傷痕後就希望阿叔可憐佢，最後阿叔都肯借200蚊。

　　多年後，有人話阿德爾森細細個為求目的就不擇手段，不過佢就咁回應：

　　「想批判一個人之前，你首先了解下佢嘅過去，因為當時嘅我別無選擇，我只有呢個方法可以拎到200蚊。」

炒股到破產，到搵BILL GATES搞展覽再出發

（Shutterstock圖片）

　　60年代起，阿德爾森前往紐約搞廣告事業，賺到錢之後就開始投資股票市場，點知遇到1969年股災，本來打算剩小小錢再搞房地產東山再起，但最後樓市都頂唔順，公司關門大吉。

　　不過成功嘅人就係不斷嘗試，佢當時參加一個房地產展覽會，發現原來展覽係「媒體」嘅有力延伸，只要「雜誌＋展覽」呢個組合，賺錢能力十分可觀。當時佢留意到電腦時代嘅來臨，所以係1979年1月推出《數據與通信》嘅雜誌，後來成立「COMDEX」公司，係1980年至1990年間舉辦多個貿易展，成功奪得大眾目光，更開創商務活動與渡假勝地結合嘅會展業商機。

　　阿德爾森想邀請剛剛起步無耐嘅微軟創辦人比爾蓋茨做演講，不過原來當時嘅比爾係怕羞仔，唔多想係大眾面前介紹「咩係電腦程式」，但阿德爾森就話啦：

　　「呢次展覽並唔係單單介紹電腦程式，而係向大眾推廣電腦嘅機會，如果微軟做唔到每個人都用到嘅電腦，顯然公司嘅前途不再光明。」

　　最後呢番說話打動到比爾，而比爾嘅演講為展覽帶來大量人流，據統計當年參展電腦商高達2480間，參觀人數高達21萬，所以「COMDEX」稱為電腦展嘅代名詞。

10億身家未夠皮，再進軍賭場酒店

 （Shutterstock圖片）

　　連比爾蓋次都請到，有咩再難到阿德爾森呢？當時佢身家已經接近10億美金，不過佢好似未夠皮，有一日忽發奇想：

　　「如果參展商要使錢去住啲細價酒店，點解我唔自己開一間大酒店，賺埋佢哋呢筆呢？」

　　所以係1989年，阿德爾森用1.28億美金，買落拉斯維加斯金沙賭場酒店，順便係隔離起埋「金沙展覽中心」，發展酒店、賭博、商務為一體嘅商業中心；1999年，佢將金沙賭場酒店重建，發展成一個有度假村、酒店、賭場嘅娛樂場，「威尼斯人渡假村」就從此誕生，往後每年入住平率有九成七。

　　2000年，阿德爾森更打低多個勁敵，係澳門爭贏賭權，澳門金沙娛樂場係2004年誕生，阿德爾森嘅「賭王」神話就從此延續開去。

撰文：李皆穎