中秋佳節，梗要送禮。唔送禮，你啲合作伙伴又點會記得你，畀生意你做呢？所以好多公司在中秋節前後，都會準備一系列「擦鞋中秋佳品」。之但係拋頭露面出去送禮嘅，多數都係經理級以上人物。不過，做得經理又點會親自準備禮物呢？梗係委派公司一班小薯幫佢準備貢品啦！但貢品都唔係咁容易準備，呢個情況下，小薯要被逼喺有限時間內，準備好上司要求嘅貢品，真係人生一大挑戰！ 

　　需知道你送禮、佢又送禮，唔出啲計仔，個客一樣會唔記得你。所以班經理級人物一於出盡小宇宙嘅創意，務求做到「送禮勤」一樣，可以名留青史，被人記住同歌頌。月餅、水果等等飲飽食醉嘅「行」嘢一定唔少得，而今年得到最多人投票，能夠追上「送禮勤」心思嘅，亦都係送出一幅自畫像，仲要係有上司自己，加埋客人成條Team同事的卡通人像自畫像。

　　上司突然嘅創意，就要求小薯要喺一星期內搵到畫家，畫足足15個人嘅卡通自畫像，仲要放大印埋落畫布，買埋畫框鑲起佢咁送畀客人。講就易，但負責嘅同事嗰7日簡直生不如死！ 

　　要搵啱挑剔上司心水嘅畫家已經難，仲要搵個啱心水、又可以喺3日內起貨嘅畫家先係難上加難！而且仲要預留3日去印畫，確保喺第7日可以將作品交到上司手上。（7日內其中一日非working day，印刷公司唔做嘢，即是total得6日去死幅畫出嚟）好啦！當你以為搵到畫家，等佢準時交咗畫就一天都光晒？傻啦！上司又點會咁生性！ 

　　「嘩！呢兩個畫得咁唔似嘅？仲有點解好似用木顏色畫咁？好low囉！」 

　　「呃⋯係個畫家嘅style嚟嘅，你睇佢其他reference 時都係用呢隻顏料架，都畫得幾靚吖。」 

　　「唔得囉！嗰2個畫得唔似嘅我唔接受！叫佢改過！」 

　　「呃，改唔係問題，但佢重畫都要時間。而且我哋仲要留3日去印畫啊，4點前要落到單，我怕趕唔切……」 

　　「冇時間啦？好啦好啦，咁你快啲啦！」 

　　一句就將個波拋返畀同事，而且更無諗過要求合唔合理！而同事只好立即聯絡畫家，要求佢重畫兩個人畫像。聽講話畫家都好好人，知道同事被上司壓迫、又急著要拎去印刷鋪印刷，所以都「拍爛檔」咁承諾第二日嘅上晝可以交畫。不過，卡通自畫像2.0一樣唔啱上司胃口，時間又只係得返3日，危機步步迫近……

 (下期待續)