半年一度某日資大型百貨公司感謝周即將開始，各大品牌都已經透過社交平台，大肆宣傳感謝周的特價貨品。有留意我較早之前的一篇「中環女人，應該係Top Sales」文章，應該都知道女人對於購物的慾望及破壞力可以有幾大。不過，原來有種女人，為了凸顯自己的身份有多高級，反而會排斥及抗拒這個人人期待的感謝周。 

　　事緣某天工作，同事A又被廣泛流傳的社交廣告「燒」到，立即發揮病毒的本色，把thankful week中各品牌的「限量」「優惠」套裝，整合及排序，宣揚給各位女戰友。兩大必殺字眼出手，定必殺得辦公室片甲不留！辦公室所有雌性生物，紛紛討論作戰策略：

　　「呢set抵買啊！」

　　「係就係，不過限量，好難搶啊！不如要求低啲，要呢set啦！」

　　「不如咁啦！嗰日我哋約好一齊排隊，入到場後分頭行事！買到邊套盡買啦，之後出返嚟先share返錢同貨！咁樣容易搶到多啲啦！」

　　就在此時，一位沒有加入（或可稱為沒有被邀請加入）的女同事走近，眼尾一睄……

　　「嘩！咁多人去迫，我真係冇興趣去啦！」

　　說畢，現場空氣猶如靜止了一樣。當然啦！沒有人邀請你，為何又要失驚無神刺激一班興致勃勃的女戰友呢？同事A為了令自己辛辛苦苦組織的軍隊重拾軍心，決定率先打破沉默！

　　「但啲set真係超抵啊！你睇！搶到真係慳返半年唔使再使錢啦！」

　　「抵係幾抵，但set set都得幾套，夠你買定夠佢買呀？幾百人入去搶嘢咁，我老啦，真係唔想入去同人迫囉！同埋啊，我聽人講，thankful week呢啲限量裝全部都就快過期架！將啲貨尾夾夾埋埋整做一set，再平少少咁賣畀你哋促銷咋！你哋小心用完爛面添啊！我就寧願舒舒服服試完用，正價先買喇！」

　　聽完一番大言不慚的說話，同事A都決定放棄佢，直接無視呢位比其他人高級的同事。不過，三個女人一個墟，女戰士兵團當然不少得瘋狂「數」佢啦！甚麼「要呃你，話知你買正價貨都會呃架啦！」「佢咁老，迫都迫唔入去，用乜都救唔返塊面架啦！怕乜用完爛面啊！」「老老實實，佢冇興趣又走嚟偷聽？佢獨孤精咋啩！」等等三百種咒罵及發泄句子都出齊！不過，姐妹們又講得啱嘅。你冇興趣、你嫌cheap，唔一定要講出口，令大家難堪嘅。反正又冇人搵把刀「行住」你條頸要你去，你想買正價貨咪買囉，何必踩低別人去抬高自己身價呢？