千呼萬喚，我地老闆終於肯喺上星期食開年lunch。雖然過左年都一段時間，但有人請食一餐得一餐嘛！人多多食咩好？秘書諗都唔諗就幫大家決定去飲茶！一盅兩件花款多，總有一樣岩你胃口！當大家陶醉於老闆邀請大家食開年飯嘅email時，再收到秘書一個email: 「please remember to eat your breakfast. 」

　　畀三秒大家load吓究竟咩意思，三、二、一，有答案嘅人，請先記喺腦入面，等一陣睇下估唔估得啱。而當時嘅我，唔明秘書點解要提我食早餐，再細心望望收件者，除咗老闆之外，全公司上下都收到呢個email。呢刻，我都開始有啲眉目！簡單來講，咪就係老闆好度縮，請食開年飯嘅budget細到連秘書都估大家會食唔飽，所以提醒大家記得當日要食個飽早餐頂肚。好，起碼大家有晒心理準備，知道開年Lunch飽極都有限。到咗開年飯當日，先知一個人要孤寒可以有幾孤寒！

　　話說當日秘書喺酒樓訂咗四圍，到lunch時間大家就齊齊出發。到咗酒樓，大家發現每圍都已經上咗點心，原來係秘書事前已經點左食物。以為秘書咁細心，叫定食物等大家唔使等？錯喇！大家打開蒸籠蓋，見到四台嘅食物都一式四份，一模一樣，仲要係飽肚點心之選！例如馬拉糕、腸粉、炒粉麵等等。不過，就算成餐都係食呢啲飽肚之選，面對嚴重低budget嘅困局，大家都係食唔飽，如果唔係秘書又點會挺而走險叫大家食個飽早餐頂肚呢？咁大家成年人，食唔飽自己識得買野食架啦！當枱上嘅野清哂，大家諗住唔夠食，追加點心，最多咪自己暗荷包。呢個時候，秘書即刻衝埋嚟……

　　「你哋做乜嘢呀？想再叫點心？」

　　「係呀，唔夠食，大家都唔飽！放心啦我哋會自己俾返錢！」

　　「唔得啊！已經埋咗單，唔可以再叫嘢食！」

　　「自己俾返錢都唔得？」

　　「得嘅，不過你地要另外再開茶位，比茶錢，因為而家個茶位已經埋咗單喇。」

　　眾人聽到緊係即時O嘴！有咩理由我喺度飲茶，要另外畀錢再開個茶位？Budget唔夠，食唔飽都算數，咁我哋咪自己補錢囉。但而家係迫我哋再開茶位，迫我哋再蝕錢畀大財團茶樓，如此損人不利己嘅事，諗都冇諗過會發生係自己公司身上！

　　最終大家選擇食個又餓又嬲嘅開年飯，再等Tea Time先自費填飽肚。其實，既然冇錢不如唔好叫大家食開年飯！食完個個對公司嘅憎恨又再昇華，咁不如當初唔好扮闊佬請食飯！