噚日公布完管治班子，林鄭月娥今日公布新一屆行政會議成員名單，「公職王」陳智思可謂無懸念，大熱姿態出任行政會議召集人一職。管治班子冇咩驚喜的林鄭，行會人選卻有啲驚又有啲喜，皆因有任總之餘，葉劉又重返行會睇實「妹妹」林鄭搞乜鬼，林鄭仲叫埋湯家驊(Ronny)入閣，想扮晒同泛民有偈傾，不過佢似乎諗多咗喇。

陳智思大熱任召集零驚喜

　　陳智思過往三屆政府都有出任行會成員，做召集人當然駕輕就熟。Jenny之前都探過Bernard口風，佢當時不斷話唔會做官，但就唔抗拒做行會召集人，睇來當時林鄭一早已經Mark實佢。呢個任命講真一啲驚喜都冇，反而小妹好期待，陳智思仲會唔會出任一啲畸形怪狀的委員會。

　　話又說回來，行會召集人呢個位，一向被視為「白金升降機」，坊間傳Bernard將來會做特首，都傳到爛，而Bernard都同Jenny講過好多次「咪搞我喇！」不過政治一日都嫌長，今日點知聽日事，係咪先？

葉劉再入行會為鞭策「妹妹」？

　　所以，今日有少少驚喜的，反而是新民黨主席葉劉淑儀重返行會，全因Jenny之前幾次見佢，佢都表明不會加入行會或新班子，點知事隔只是個零兩個月卻一改口風，轉頭出現在新一屆行會成員名單之上。葉劉今鋪「唔嫁又嫁」，小妹就覺得，係咪因為做行會成員就可以幫手鞭策「妹妹」林鄭工作呢？

湯家驊修成正果入行會 AY鬧爆

　　另一邊廂，民主思路召集人湯家驊的「第三條路線」亦修成正果。早前已盛傳Ronny會入行會，今日果真榜上有名，佢講過從政唔係為咗永遠做反對派，今次終於如願以償啦！佢同人講有泛民背景人士加入政府及行會是小突破，咦？原來他還記得自己係泛民啊！

　　不過佢昔日的徒弟楊岳橋就一於「冇面畀」大呼「湯家驊不代表民主派」，仲話如果林鄭想與泛民人士溝通，搵佢本人楊岳橋都一樣得。AY你咁講，好易令人誤會㗎！

任總夠朋友 再出山助林鄭

　　今次名單入面「好評」較多的相信是任總。據Jenny所知，政界又好、民間又好，見到新班子「咁樣樣」都多番質疑林鄭嘅「理財新哲學」係咪能夠成事。面對呢個困境，林鄭唯有轉為邀請「三大靠山」加入行會，為新班子「補位」啦。所以，任總做完林鄭競選辦顧問後，又再「出山」，夥拍金發局主席查太，幫幫林鄭，而且任總夠猛料，真係齋坐都有助行會形象「升呢」啦。